मँचेस्टर : वृत्तसंस्था
बॉस बेबी म्हणून ओळखल्या जाणा-या वैभव सूर्यवंशीला अखेर आंतरराष्ट्रीय पदार्पणाची संधी मिळाली. मँचेस्टरमध्ये इंग्लंडविरुद्धच्या दुस-या टी-२० सामन्यासाठी जेव्हा भारतीय संघ मैदानात उतरला, तेव्हा सर्वांच्या नजरा १५ वर्षीय खेळाडूवर खिळल्या होत्या. बिहारच्या वैभव सूर्यवंशीला आज भारतीय टी-२० संघाची कॅप देण्यात आली. अवघ्या १५ वर्षे ९९ दिवस वयाचा असताना त्याने आंतरराष्ट्रीय क्रिकेटमध्ये पदार्पण केले. या पदार्पणासह वैभवने जागतिक विक्रम नोंदविला. तो आंतरराष्ट्रीय क्रिकेटमध्ये भारताकडून पदार्पण करणारा सर्वांत तरुण खेळाडू ठरला. मास्टर ब्लास्टर सचिन तेंडुलकरला त्याने मागे टाकले. याशिवाय त्याने जागतिक क्रिकेटमध्येही सर्वांना मागे टाकत विश्वविक्रम नोंदविला. पण पदार्पणात तो फारशी छाप सोडू शकला नाही. कारण तो शॉर्ट बॉलवर स्टम्पिंग होत अवघ्या १४ धावांवर बाद झाला.
भारतासाठी सर्वांत तरुण वयात पदार्पण करण्याचा विक्रम यापूर्वी मास्टर ब्लास्टर सचिन तेंडुलकरच्या नावावर होता. वैभवने अवघ्या १५ व्या वर्षी हा मान मिळवून भारतीय क्रिकेटमध्ये एका नव्या पर्वाची सुरुवात केली. आयपीएल २०२६ चा हंगाम राजस्थान रॉयल्सच्या अवघ्या १५ वर्षांच्या वैभव सूर्यवंशीने पूर्णपणे गाजवला. टी-२० क्रिकेटच्या इतिहासातील एका फलंदाजाची ही सर्वात स्फोटक आणि ऐतिहासिक कामगिरी मानली जात आहे. आयपीएलच्या इतिहासात सर्वात कमी वयात (१५ वर्षे) सर्वाधिक धावा करून ऑरेंज कॅप जिंकण्याचा अभूतपूर्व पराक्रम त्याने केला. १६ सामन्यात त्याने ७७६ धावा केल्या. त्याने गुजरात टायटन्सविरुद्ध अवघ्या ३५ चेंडूंत शतक ठोकले. हे आयपीएल इतिहासातील दुसरे सर्वात वेगवान शतक आहे. तसेच तो टी-२० क्रिकेटमध्ये शतक झळकावणारा जगातील सर्वात तरुण खेळाडू ठरला आहे.
