छ. संभाजीनगर : प्रतिनिधी
शिवसेना नेते चंद्रकांत खैरे यांनी लोकसभा निवडणुकीपूर्वी एकनाथ शिंदे गटाने आणि भाजपाने मोठी ऑफर दिल्याचा दावा केला. लोकसभा निवडणुकीत खैरे यांचा पराभव झाला होता. त्यानंतर पक्ष कार्यक्रमात उद्धव ठाकरे यांना सोडून जाऊ नका म्हणून त्यांनी पक्ष कार्यकर्ते आणि पदाधिका-यांना साष्टांग दंडवत घातला होता. तर आता त्यांनी अजून एक गौप्यस्फोट करत मोठी खळबळ उडवून दिली आहे.
लोकसभा निवडणुकीच्या आधी संजय शिरसाट यांनी मला ऑफर दिली होती. शिंदे गटाकडून लोकसभा निवडणूक लढवा, आम्ही सर्व खर्च करू अशी ऑफर दिल्याचा दावा त्यांनी केला. संजय शिरसाठ यांनी शिंदे गटात येण्याची ऑफर दिल्याचा दावा चंद्रकांत खैरे यांनी केला. त्यांच्या या दाव्याने एकच खळबळ उडाली आहे.
भाजपाने दिली राज्यपालपदाची ऑफर
तर भाजपाकडूनही आपल्याला राज्यपालपदाची ऑफर देण्यात आल्याचा दावा खैरे यांनी केला. हरिभाऊ बागडे यांच्याप्रमाणे राज्यपाल करण्याची ऑफर देण्यात आल्याचे ते म्हणाले. राज्यपालपदासाठी आपल्याला दिल्लीतून ऑफर आल्याचा चंद्रकांत खैरे यांनी दावा केला. त्यामुळे शिंदे गट आणि भाजपा उद्धव ठाकरे गट फोडण्याच्या तयारीत होते, असे सूतोवाच त्यांनी केले.
दोघांनी बांधला कौतुकाचा पूल
दरम्यान २६ जानेवारी रोजी प्रजासत्ताक दिनानिमित्त मंत्री संजय शिरसाट आणि चंद्रकांत खैरे यांची भेट झाली. यावेळी दोघांमध्ये चांगलीच चर्चा झाल्याचे दिसले. दोघांमधील हास्यविनोद हा चर्चेचा विषय ठरला. दोघांनी एकमेकांना काय कानमंत्र दिला यावर राजकीय वर्तुळात खमंग चर्चा झाली.
