नवी दिल्ली : दिल्ली वगळता देशातील सर्व राज्यांमध्ये पाऊस पडत आहे. आतापर्यंत सामान्यपेक्षा १२.३ टक्के जास्त पाऊस पडला आहे. २६ जूनपर्यंत देशात सामान्यपेक्षा १३४.३ मिमी पाऊस पडायला हवा होता, परंतु १४६.६ मिमी झाला आहे.
उत्तराखंडमध्ये मुसळधार पावसामुळे मुंकटिया परिसरात भूस्खलन झाल्याने केदारनाथ महामार्ग पुन्हा एकदा बंद झाला आहे. रस्त्यावर दगड आणि ढिगारा सतत पडत आहे. एसडीआरएफ आणि एनडीआरएफच्या तुकड्या घटनास्थळी उपस्थित आहेत आणि जंगलातील पर्यायी मार्गांनी प्रवाशांना सुरक्षितपणे बाहेर काढत आहेत. देशात पावसामुळे मृतांचा आकडाही वाढू लागला आहे. हिमाचलच्या कुल्लू जिल्ह्यात ढगफुटीमुळे आतापर्यंत ५ जणांचा मृत्यू झाला आहे. तर ७ हून अधिक जण बेपत्ता आहेत. बुधवारी कुल्लूमधील ५ ठिकाणी ढग फुटले – जिवा नाला (सैंज), शिलागड (गढसा) व्हॅली, स्ट्रो गॅलरी (मनाली), होरानगड (बंजर), कांगडा आणि खनियारा धर्मशाळेत.
त्याच वेळी, जम्मू आणि काश्मीरमधील राजौरी, पूंछ, दोडा आणि कठुआ जिल्ह्यात ढगफुटी आणि मुसळधार पावसामुळे आलेल्या पुरात २ मुलांसह ३ जणांचा मृत्यू झाला आहे. गेल्या २ दिवसांपासून गुजरातमधील अहमदाबाद, सुरत आणि नवसारी जिल्ह्यात मुसळधार पाऊस सुरू आहे. सुरतनंतर आता अहमदाबादमध्ये पूरसदृश परिस्थिती निर्माण झाली आहे. घरांमध्ये पाणी शिरले आहे.
देशात सर्वदूर पावसाची शक्यता
हवामान खात्याच्या मते, आज देशातील सर्व राज्यांमध्ये पावसाची शक्यता आहे. पूर्व राजस्थान, पश्चिम मध्य प्रदेश, उत्तराखंड, गुजरात, मध्य महाराष्ट्र, गोवा, कर्नाटक आणि केरळमध्ये पावसासाठी ऑरेंज अलर्ट आहे.
