छत्रपती संभाजीनगर : राज्यभरात खळबळ उडवून देणा-या टीसीएस लैंगिक छळ आणि धर्मांतर प्रकरणात एक मोठी घडामोड समोर येत आहे. या प्रकरणातील मुख्य फरार आरोपी निदा खान हिला आश्रय दिल्याप्रकरणी एमआयएम पक्षाचे नगरसेवक मतीन पटेल यांची आतापर्यंत विशेष तपास पथकाकडून तीन वेळा कसून चौकशी करण्यात आली आहे. मतीन पटेल यांच्या जप्त केलेल्या मोबाईलमधून मिळालेल्या डेटाच्या आधारे अनेक धक्कादायक खुलासे समोर आले असून या प्रकरणात आता माजी खासदार इम्तियाज जलील यांना देखील एसआयटीकडून चौकशीसाठी बोलवले जाण्याची शक्यता विश्वसनीय सूत्रांनी वर्तवली आहे.
या संवेदनशील आणि गंभीर गुन्ह्यामध्ये एसआयटीने आतापर्यंत एकूण आठ आरोपींना अटक केली असून, त्यांच्याविरुद्ध न्यायालयात मुख्य दोषारोपपत्र दाखल करण्यात आले आहे. मोबाईल डेटा आणि तांत्रिक तपासातून समोर आलेल्या नवीन पुराव्यांच्या आधारे, पोलिस येत्या काही दिवसांत न्यायालयात पुरवणी दोषारोपपत्र देखील दाखल करणार आहेत.
पॉलिटिकल कनेक्शनवर स्पष्टीकरण
आरोपी निदा खानला घर मिळवून दिल्याच्या आरोपामुळे अडचणीत आलेल्या मतीन पटेल यांनी प्रसारमाध्यमांशी बोलताना माजी खासदार इम्तियाज जलील यांचे नाव या प्रकरणात जोडले जात असल्याच्या दाव्यांना पूर्णपणे फेटाळून लावले आहे. निदा खान ही इम्तियाज जलील यांची नातेवाईक असल्याचा आरोप साफ चुकीचा आणि निराधार आहे असे पटेल यांनी स्पष्ट केले.
