परभणी : मानवत शहरालगतच्या रामपुरी रोडवर पोलिस अधीक्षकांच्या विशेष पथकाने धडक कारवाई करत अवैधरित्या देशी दारूची वाहतूक करणा-या दोघांना ताब्यात घेतले. या कारवाईत देशी दारूचा साठा व कार असा एकूण ४ लाख १९ हजार ३६० रुपयांचा मुद्देमाल जप्त करण्यात आला. ही कारवाई दि. ८ जून रोजी रात्री ८.५० वाजण्याच्या सुमारास करण्यात आली.
पोलिसांना मिळालेल्या गुप्त माहितीनुसार, रामपुरी रोडवर पांढ-या रंगाच्या मारुती सुझुकी स्विफ्ट डिझायर (एमएच ०३ बीसी ६५२६) या कारमधून देशी दारूची वाहतूक केली जात असल्याची माहिती मिळाली होती. त्यानुसार पोलिसांनी सापळा रचून वाहन अडवले. यावेळी वाहन चालक बैल्ले नितीन रविद्र (वय २४) व विजयकुमार देवेंद्रे पम्परी (वय २१) यांची चौकशी करण्यात आली. या वाहनाची झडती घेतली असता देशी दारूचा साठा आढळून आला. संबंधितांकडे दारू वाहतूक अथवा विक्रीसाठी कोणताही वैध परवाना नसल्याचे तपासात निष्पन्न झाले.
या प्रकरणी विशेष पथक क्रमांक २ चे पोलिस हवालदार शेख अस्लम इसमाईल शेख यांच्या फिर्यादीवरून मानवत पोलीस ठाण्यात दोघांविरुद्ध महाराष्ट्र दारूबंदी कायद्यान्वये गुन्हा दाखल करण्यात आला आहे. ही कारवाई पोलीस उपनिरीक्षक अर्जुन टर्वे, पोलीस उपनिरीक्षक शिंदे, पोलीस हवालदार सय्यद इरशाद, सूर्यकांत ताटीकोंडलवार, यशवंत वाघमारे, अस्लम शेख व वावळे यांच्या पथकाने केली. पुढील तपास मानवत पोलीस करीत आहेत.
