छत्रपती संभाजीनगर : येथे अभिजित दिपके यांच्या निवासस्थानी भेटीसाठी येणा-या नागरिकांना पोलिस उद्धट वागणूक देत असल्याचा आरोप करत त्यांनी एका पीएसआयला जाब विचारल्याचा व्हीडीओ सोशल मीडियावर चर्चेत आला आहे. मला कोणाला भेटायचे हे पोलिस ठरवणार नाहीत असे दिपके यांनी पोलिस उपनिरीक्षकाला सुनावले.
सोशल मीडियावर अभिजीत दिपके यांचा एक व्हीडीओ व्हायरल होत आहे. या व्हीडीओमध्ये ते एका पोलिस उपनिरीक्षकाला (पीएसआय) थेट घराबाहेर हाकलून लावताना दिसत आहेत. आपल्याला भेटण्यासाठी येणा-या सामान्य नागरिकांना पोलिस अत्यंत उद्धट वागणूक देत असल्याचा आरोप दिपके यांनी केला आहे. पोलिसांच्या या दंडेलशाहीवर संताप व्यक्त करत, मी कुणाला भेटायचे, हे पोलिसांनी मला सांगायची गरज नाही. मी कुणाला भेटणार हे केवळ मीच ठरवणार असे आक्रमक शब्दांत सुनावत त्यांनी त्या पोलिस अधिका-याला तिथून जाण्यास सांगितले. दरम्यान, छत्रपती संभाजीनगर येथील उखढच्या बैठकीत देशभरातील नागरिकांच्या समस्या जाणून घेण्यासाठी मोहीम राबवण्याचा, शिक्षण शुल्काच्या प्रश्नावर आंदोलन छेडण्याचा आणि १२ सदस्यीय कार्यकारिणी जाहीर करण्याचा निर्णय घेण्यात आल्याची माहितीही दिपके यांनी दिली.
अमेरिकन एआय कंपनीकडून माहितीचा वापर
अमेरिकेतील एका एआय स्टार्टअपने फ्युचरक्राईम समिट २०२६ मध्ये आपल्या एआय टूलमध्ये स्वत:ची माहिती वापरल्याचा आरोप करत अभिजित दिपके यांनी सरकारवर गंभीर प्रश्न उपस्थित केले. माझी माहिती वापरण्याची परवानगी कोणी दिली? असा सवाल त्यांनी सोशल मीडियावर केला. याचवेळी त्यांनी पंतप्रधान नरेंद्र मोदी यांनी १५ ऑगस्टच्या भाषणात जनरेशन झी आणि तरुणांच्या प्रश्नांवर भाष्य करावे, अशी मागणीही केली.
