नांदेड : प्रतिनिधी
शहरातील आनंदनगर रोड, विद्युतनगर चौक परिसरातील लोटस स्पा सेंटर येथे मसाज सेंटरच्या नावाखाली कथितरीत्या सुरू असलेल्या अवैध वेश्या व्यवसायाचा नांदेड पोलिसांच्या अनैतिक मानवी वाहतूक प्रतिबंधक पथकाने पदार्फाश केला. या कारवाईत ४ पीडित महिलांची सुटका करण्यात आली असून, गौरव राजकुमार सरपाते (व्यवसाय व्यापार, रा. राहुलनगर, हनुमानगड) याला ताब्यात घेण्यात आले आहे.
स्थानिक गुन्हे शाखा व अनैतिक मानवी वाहतूक प्रतिबंधक पथकाला आनंदनगर रोडवरील लोटस स्पा सेंटर मध्ये मसाज सेंटरच्या नावाखाली अवैध व्यवसाय सुरू असल्याची गोपनीय माहिती मिळाली होती. त्यानंतर बोगस ग्राहकाच्या माध्यमातून माहितीची खात्री करण्यात आली. ७ ऑगस्ट २०२६ रोजी रात्री सुमारे ९ वाजता पोलिसांनी आनंदनगर रोडवरील लोटस स्पा सेंटर येथे छापा टाकला. कारवाईदरम्यान ४ पीडित महिला आढळून आल्या. त्यामध्ये महाराष्ट्रासह आसाम राज्यातील महिलांचाही समावेश असल्याचे पोलिसांच्या तपासात निष्पन्न झाले. महिलांची चौकशी करून त्यांची सुटका करण्यात आली असून, त्यांच्या संरक्षणाच्या दृष्टीने पुढील कायदेशीर प्रक्रिया करण्यात आली आहे.
कारवाईपूर्वी बोगस ग्राहकाला लोटस स्पा सेंटर येथे पाठविण्यात आले होते. पंचांसमक्ष त्याच्याकडे पैसे देण्यात आले आणि ठराविक संकेत मिळाल्यानंतर पोलिसांनी छापा टाकला.छाप्या दरम्यान पंचांसमक्ष रोख ४ हजार रुपये जप्त करण्यात आले. यामध्ये बोगस ग्राहकास देण्यात आलेल्या ५०० रुपयांच्या ८ नोटांचा समावेश आहे. तसेच आरोपी गौरव सरपटे याच्या ताब्यातून १ मोबाईल (५० हजार रुपये) असा एकूण ५४ हजार रुपयांचा मुद्देमाल जप्त करण्यात आला.
या प्रकरणी विमानतळ पोलीस ठाण्यात अनैतिक मानवी वाहतूक प्रतिबंध अधिनियमा अंतर्गत गुन्हा दाखल करण्यात आला आहे. या प्रकरणाचा पुढील तपास विमानतळ पोलीस करीत आहेत.पोलीस अधीक्षक डॉ. नीलाभ रोहन यांच्या आदेशाने व पोलीस निरीक्षक अतुल भोसले यांच्या मार्गदर्शनाखाली सहायक पोलीस निरीक्षक गोविंद खैरे यांच्या नेतृत्वाखाली पोलीस अंमलदार मधुकर टोनगे, रितेश कुलथे, गणेश लोसरवार, कवठेकर यांनी कारवाई केली. तसेच महिला पोलीस उपनिरीक्षक अश्विनी गायकवाड, पोलीस अंमलदार अच्युत मोरे, केंद्रे, दिपा कठारे आणि महिला सहाय्य कक्षातील महिला अंमलदार कांचन शिंदे व देवकी पवार यांनी कारवाईत सहभाग घेतला.
