नागपूर : शहरातील गणेशपेठ येथील मध्यवर्ती बसस्थानक परिसरात उभ्या बसमध्ये आढळलेल्या ‘टिफीन बॉम्ब’चा बार फुसका निघाला. तब्बल सात तासांपर्यंत पोलिसांसह संपूर्ण सुरक्षायंत्रणा यामुळे वेठीस होती.
१ फेब्रुवारीला एमएच- ४०- वाय-५०९७ या क्रमांकाची बस गडचिरोलीतील चामोर्शी येथून नागपुरात आली. तीत चालक व वाहक झोपले. २ फेब्रुवारीला चालकाने बस सुरू करायण्याचा प्रयत्न केला. मात्र, ती सुरू झाली नाही. नादुरुस्त बस बसस्थानकामागील कार्यशाळेत नेण्यात आली. नागपुरात सुटे भाग उपलब्ध नसल्याने दुरुस्तीसाठी गडचिरोलीहून सुटे भाग मागविण्यात आले. ४ फेब्रुवारीला सुटे भाग आल्याने बस दुरुस्त करण्यात आली. बस दुरुस्तीनंतर मंगळवारी या बसने नागपूर-सावनेर-नागपूर प्रवासी वाहतूक करण्यात आली. ती पुन्हा कार्यशाळेत ठेवण्यात आली. बुधवारी सकाळी बुटीबोरी परिसरात एक बस नादुरुस्त झाली.
ती ‘टो’ करून आणण्यासाठी गडचिरोली आगाराची हीच बस बुटीबोरीला पाठविण्यात आली. दीड तासानंतर बस पुन्हा कार्यशाळेत आली. दुपारी १.३० वाजताच्या सुमारास एक चालक बसमध्ये चढला. सीटच्या बाजूला त्याला टिफीन बॉक्स दिसला. पाहणी केली असता त्याला संशय आला. त्याने आगार व्यवस्थापक गौतम शेंडे यांना माहिती दिली. शेंडे यांनी गणेशपेठ पोलिसांना कळविले. माहिती मिळताच पोलिस उपायुक्त गोरख भामरे, विशेष शाखेच्या उपायुक्त श्वेता खेडकर, दहशतवादविरोधी पथकाचे साहाय्यक पोलिस आयुक्त अभय पान्हेकर, निरीक्षक प्रदीप लांडे व बॉम्बशोधन नाशकाचे पथक तेथे पोहोचले. संपूर्ण परिसर सील केला. बॉम्बशोधन नाशक पथकाने सावधगिरीने टिफीन सुराबर्डीत नेला.
सुराबर्डीत टिफीन नष्ट करण्यासाठी नेण्यात आला. यावेळी न्यायवैद्यक प्रयोगशाळेचे अधिकारी व बॉम्बशोधन नाशक पथकाचे पथक उपस्थित होते. प्रयोगशाळेच्या अधिका-यांनी पाहणी केली. डबा उघडला असता त्यात पिवळ्या रंगाचे पावडर आढळले. तपासणी केली असता हे पावडर पुण्यातील एक कंपनी अग्निशमन यंत्र बनविण्यासाठी वापरत असल्याचे स्पष्ट झाले. बस नागपुरात आणणा-या चालकाचीही पोलिस कसून चौकशी केली. त्यानेही अग्निशमन यंत्र असल्याचे सांगितले. त्यानंतर पोलिस व सुरक्षा यंत्रणेने सुटकेचा श्वास सोडला.
