दुबई : संयुक्त अरब अमिरात आणि आसपासच्या वाळवंटी भागात मंगळवारी झालेल्या मुसळधार पावसामुळे पूरस्थिती निर्माण झाली. जगातील सर्वात स्मार्ट शहरांपैकी एक असलेल्या दुबईमध्ये आज सर्वत्र पाणीच पाणी दिसत आहे. पावसामुळे दुबई आंतरराष्ट्रीय विमानतळ देखील बंद करावे लागले.
महामार्गावर पाणी साचल्याने वाहने पाण्यात अडकली होती. गार्डियनच्या वृत्तानुसार, सोमवारी रात्री पावसाला सुरुवात झाली आणि मंगळवारी सायंकाळपर्यंत दीड वर्षात जेवढा पाऊस पडतो तेवढा पाऊस पडला. यूएईपूर्वी ओमानी अधिका-यांनी पुराचा इशारा दिला होता.
मंगळवारच्या पावसाला ऐतिहासिक घटना म्हटले जात आहे. १९४९ नंतर देशातील हा सर्वाधिक पडलेला पाऊस आहे. निसर्गाशी छेडछाड हे यामागचे कारण असल्याचे तज्ञ सांगत आहेत. अलीकडील पाऊस आणि त्यानंतर दुबई आणि यूएईच्या इतर भागांमध्ये आलेला पूर हे देशात होत असलेल्या क्लाउड सीडिंगशी संबंधित आहे.
संयुक्त अरब अमिराती हे पृथ्वीवरील सर्वात उष्ण आणि कोरड्या प्रदेशांपैकी एक आहे. पाऊस वाढविण्यासाठी क्लाउड सीडिंग तंत्रज्ञानाचा वापर करण्यात हा देश पुढे आहे. या तंत्रज्ञानाचा मुख्य उद्देश म्हणजे वाढती लोकसंख्या आणि अर्थव्यवस्थेची पाण्याची मागणी पूर्ण करणे, जे पर्यटन आणि इतर क्षेत्रांमध्ये विविधता आणत आहे. युएईने २००२ मध्ये क्लाउड सीडिंग ऑपरेशन सुरू केले. हे विशिष्ट कालावधीत ढगांच्या संरचनेवर लक्ष केंद्रित करते जेव्हा ते अतिरीक्त पाऊस निर्माण करतात.
ब्लूमबर्गच्या अहवालात हवामानशास्त्रज्ञ अहमद हबीब यांच्या हवाल्याने म्हटले आहे की, नुकतीच अल-ऐन विमानतळावरून विमाने क्लाऊड सिडींग रोपणासाठी पाठवण्यात आली. त्यानंतर पूराच्या पावसामुळे दुबई विमानतळावर पाणी भरले. यामुळे ४५ उड्डाणे रद्द करण्यात आल्याने हजारो प्रवासी अडकले आहेत.
