बठिंडा : येथे घरी बॉम्ब बनवण्याच्या प्रयत्नाने सुरू झालेले प्रकरण आता दहशतवादी नेटवर्कपर्यंत पोहोचले आहे. येथील एका घरात ११ सप्टेंबर २०२५ रोजी स्फोटके तयार करत असताना बाप-लेक गंभीर जखमी झाले होते. एनआयएने सुरू केलेल्या तपासात या प्रकरणी आता अनेक खुलासे होत आहेत.
एनआयएने मुलगा गुरप्रीतच्या ऑनलाइन कट्टरतावाद, दहशतवादी संघटना जैश-ए-मोहम्मदशी संबंध, इंटरनेटवरील संशयास्पद गतिविधी आणि निधी गोळा करण्याशी संबंधित पुरावे समोर आल्याचा दावा केला. अहवालात म्हटले आहे की, तो दहशतवादी मसूद अजहरच्या भाषणांनी प्रभावित होता.
एनआयएने मार्च २०२६ मध्ये आरोपपत्र दाखल केले. त्यानंतर आरोपीने स्वत:ला आरोपांतून मुक्त करण्याची मागणी केली. पण आता मोहालीच्या विशेष एनआयए न्यायालयाने अर्ज फेटाळत म्हटले आहे की, त्याच्याविरुद्ध प्रथमदर्शनी पुरेसे पुरावे आहेत. न्यायालयाने म्हटले की, आरोपीवर आता यूएपीए(बेकायदेशीर गतिविधी (प्रतिबंध) अधिनियम) आणि स्फोटक पदार्थ अधिनियमांतर्गत खटला चालेल. आरोपीच्या वकिलांनी केलेले युक्तिवाद न्यायालयात टिकले नाही.
बॉम्ब बनवताना वडील-मुलगा जखमी
जगतार सिंग यांचा मुलगा गुरप्रीत सिंग याने बॉम्ब बनवण्याच्या तयारीसाठी स्फोटक सामग्रीचा वापर केला होता. ११ सप्टेंबर २०२५ रोजी त्याचा स्फोट झाला. यात गुरप्रीत सिंग आणि त्याचे वडील जगतार सिंग गंभीर जखमी झाले.
बठिंडात गुन्हा दाखल
याच दिवशी नेहियांवाला पोलिस ठाणे, बठिंडा येथे एफआयआर क्रमांक १९८ नोंदवण्यात आला. यात सुरक्षेशिवाय स्फोटक किंवा ज्वलनशील साहित्य बाळगल्याच्या आरोपाखाली कलम २८७ आणि २८८ लावण्यात आले. स्फोटक किंवा आगीमुळे मालमत्तेचे मोठे नुकसान केल्याच्या आरोपाखाली कलम ३२६(टी) लावण्यात आले. याव्यतिरिक्त, बॉम्ब किंवा स्फोटक बनवणे, पुरवणे किंवा स्वत:जवळ बाळगल्याच्या आरोपाखाली स्फोटक पदार्थ कायद्याच्या कलम ३, ४ आणि ५ अंतर्गत गुन्हा दाखल करण्यात आला.
