कोलकाता: पश्चिम बंगालच्या राजकारणात आज एक नवा अध्याय सुरू होत आहे. भारतीय जनता पक्षाचे नेते शुभेंदू अधिकारी आज सकाळी ११ वाजता पश्चिम बंगालच्या मुख्यमंत्रीपदाची शपथ घेणार आहेत. कोलकात्याच्या ऐतिहासिक ब्रिगेड परेड ग्राऊंडवर हा शपथविधी सोहळा पार पडणार आहे.
या सोहळ्यासाठी केंद्र सरकारमधील अनेक दिग्गज मंत्री कोलकात्यात दाखल झाले आहेत. केंद्रीय संरक्षण मंत्री राजनाथ सिंह, गृहमंत्री अमित शहा आणि भाजपचे राष्ट्रीय अध्यक्ष यांच्यासह अनेक राज्यांचे मुख्यमंत्री या कार्यक्रमाला उपस्थित राहणार आहेत. पंतप्रधान नरेंद्र मोदी देखील या ऐतिहासिक क्षणाचे साक्षीदार होण्यासाठी उपस्थित राहण्याची शक्यता आहे.
शुभेंदू अधिकारी यांनी भवानीपूर मतदारसंघातून ममता बॅनर्जी यांचा पराभव करून ऐतिहासिक विजय मिळवला आहे. गेल्या १५ वर्षांपासून असलेल्या तृणमूल काँग्रेसच्या सत्तेला सुरुंग लावत भाजपने २९४ पैकी २०७ जागा जिंकून दणदणीत बहुमत मिळवले आहे. शुभेंदू अधिकारी यांच्या रूपाने बंगालला तब्बल ५५ वर्षांनंतर ग्रामीण भागातील नेतृत्व लाभलेला मुख्यमंत्री मिळणार आहे.
