मुंबई : भारतीय म्युच्युअल फंड उद्योगातील व्यवस्थापनाखालील मालमत्ता ५० लाख कोटी रुपयांच्या पुढे गेली आहे.
गेल्या वर्षी शेअर बाजारातील प्रचंड वाढीचा परिणाम म्युच्युअल फंड उद्योगाच्या मालमत्तेवर दिसून येत आहे. डिसेंबर २०२३ मध्ये सेन्सेक्स ७.५३ टक्क्यांनी वाढला, तर निफ्टी निर्देशांक ७.९३ टक्क्यांनी वाढला. दरम्यान, सिस्टिमॅटिक इन्व्हेस्टमेंट प्लॅन मधील गुंतवणूक डिसेंबरमध्ये वाढून १७,६१० कोटी झाली आहे.
असोसिएशन ऑफ म्युच्युअल फंड ऑफ इंडियाच्या उपलब्ध आकडेवारीनुसार, डिसेंबरमध्ये ओपन-एंडेड स्कीम्स अंतर्गत व्यवस्थापनाखालील एकूण मालमत्ता ५०.८० लाख कोटी रुपये होती, तर नोव्हेंबर २०२३ मध्ये हा आकडा ४८.७८ लाख कोटी रुपये होता.
नोव्हेंबरमध्ये स्मॉलकॅप फंडांमध्ये निव्वळ ओघ ३,६९९ कोटी होता, तर मिडकॅप फंडांमध्ये निव्वळ ओघ रु. २,६६६ कोटी होता. संबंधित कालावधीत लार्जकॅप फंडांमध्ये निव्वळ गुंतवणूक ३०७ कोटी होती. इक्विटी-आधारित म्युच्युअल फंडांमधील प्रवाह नोव्हेंबरमध्ये २२ टक्के कमी झाला. डिसेंबरमध्ये डेट फंडातील निव्वळ गुंतवणूक १,५०५ कोटी रुपये होती.
ओपन-एंडेड इक्विटी म्युच्युअल फंडातील निव्वळ प्रवाह नोव्हेंबरमध्ये १५,५३६ कोटींच्या तुलनेत डिसेंबरमध्ये ९ टक्क्यांनी वाढून १६,९९७ कोटींवर पोहोचला आहे. याच महिन्यात, स्मॉलकॅप फंडांमध्ये निव्वळ गुंतवणूक ३,८५८ कोटी रुपये होती, तर मिडकॅप फंडांमध्ये ती ४८ टक्के कमी झाली आहे.
