बीड : प्रतिनिधी
मराठा आरक्षण आंदोलनाचे नेते मनोज जरांगे पाटील यांनी नारायण गडावरील मेळाव्यात ५०० कोटी रुपयांच्या व्यवहाराचा उल्लेख करत उपमुख्यमंत्री एकनाथ शिंदे यांच्यावर गंभीर सवाल उपस्थित केले. या आरोपाबाबत शिंदे यांनी जाहीरपणे उत्तर द्यावे, अशी मागणी जरांगे यांनी केली. दसरा मेळाव्यात किंवा दुस-या दिवशी संध्याकाळपर्यंत या प्रश्नावर भूमिका स्पष्ट करावी, असे आव्हानही त्यांनी दिले. त्यांच्या या वक्तव्यामुळे राजकीय वर्तुळात चर्चेला सुरुवात झाली आहे.
नारायण गडावरील भाषणात मनोज जरांगे पाटील यांनी थेट एकनाथ शिंदे यांना उद्देशून प्रश्न उपस्थित केला. भाजपच्या केंद्रातील आणि राज्यातील काही मोठ्या नेत्यांना मनोज जरांगे यांना ५०० कोटी रुपये द्यायचे असल्याचे सांगण्यात आले होते का? तसेच, श्रीकांत शिंदे यांनी ही रक्कम आणून दिल्याची चर्चा आहे का, असा सवाल त्यांनी केला.
या प्रकरणावर मौन न बाळगता शिंदे यांनी स्पष्ट उत्तर द्यावे, अशी मागणी जरांगे यांनी केली. पैसे दिले असतील तर ते मान्य करावे आणि दिले नसतील तर तसे जाहीरपणे सांगावे, असे ते म्हणाले. आपली बदनामी करण्यासाठी अशा प्रकारचे आरोप किंवा चर्चा पसरवली जात आहे का, असा प्रश्नही त्यांनी उपस्थित केला.
५०० कोटी रुपयांच्या रकमेचा उल्लेख करत जरांगे यांनी उपरोधिक शब्दांत आपली भूमिका मांडली. एवढी मोठी रक्कम नेमकी किती असते, याची कल्पना लोकांनी करावी, असे ते म्हणाले. आपण आयुष्यात एकाच वेळी पाच हजार रुपयेही पाहिले नसल्याचे सांगत त्यांनी या व्यवहाराच्या चर्चेवर प्रश्नचिन्ह उपस्थित केले.
जर आपल्याला खरोखरच ५०० कोटी रुपये मिळाले असते, तर दुष्काळाचा सामना करणा-या शेतकरी बांधवांना मदत केली नसती का, असा सवाल जरांगे यांनी केला. शेतकरी संकटात असताना एवढी मोठी रक्कम स्वत:कडे ठेवण्याऐवजी ती गरजू लोकांना दिली असती, असा युक्तिवाद त्यांनी आपल्या भाषणात केला.
एकनाथ शिंदे काय उत्तर देणार? मनोज जरांगे पाटील यांनी ५०० कोटी रुपयांच्या व्यवहाराचा मुद्दा उपस्थित करत एकनाथ शिंदे यांच्याकडे जाहीर स्पष्टीकरण मागितले आहे. या आरोपांमागील सत्य काय, याबाबत अधिकृत भूमिका समोर येणे महत्त्वाचे आहे.
