शिरूर अनंतपाळ : प्रतिनिधी
मराठा समाजाला आरक्षण मिळावे, या मागणीसाठी अंतरवली सराटी येथे मराठा संघर्षयोद्धा मनोज जरांगे पाटील यांच्या नेतृत्वाखाली सुरू असलेल्या आंदोलनास पाठिंबा दर्शवण्यासाठी शिरूर अनंतपाळ तालुका बंदची हाक देण्यात आली होती. या बंदला तालुक्यात उत्स्फूर्त प्रतिसाद मिळाला असून, तालुक्यातील बाजारपेठा, व्यापारी प्रतिष्ठाने, शाळा व महाविद्यालये बंद ठेवून मराठा आरक्षणाच्या मागणीला पाठिंबा दर्शविण्यात आला.
मराठा समाजाच्या आरक्षणाच्या मागणीसाठी अंतरवली सराटी येथे सुरू असलेल्या आंदोलनाची दखल घेत शिरूर अनंतपाळ तालुक्यातील विविध संघटना व मराठा समाज बांधवांनी बंदचे आवाहन केले होते. त्यास व्यापारी वर्गाने सकारात्मक प्रतिसाद देत आपली दुकाने व व्यावसायिक आस्थापने बंद ठेवली. तसेच शाळा व महाविद्यालयांनीही बंदमध्ये सहभागी होत आंदोलनास पाठिंबा दर्शविला. बंदमुळे तालुक्यातील प्रमुख बाजारपेठांमध्ये दिवसभर शुकशुकाट दिसून आला. अनेक ठिकाणी व्यापा-यांनी स्वयंस्फूर्तीने आपली प्रतिष्ठाने बंद ठेवली. मराठा आरक्षणाच्या मागणीसाठी समाजाच्या भावना सरकारपर्यंत पोहोचाव्यात आणि आंदोलनाला व्यापक पाठिंबा मिळावा, या उद्देशाने हा बंद पाळण्यात आला. दरम्यान बंदच्या पार्श्वभूमीवर कोणताही अनुचित प्रकार घडू नये यासाठी प्रशासन व पोलिसांकडून आवश्यक खबरदारी घेण्यात आली. तालुक्यात बंद शांततेत पार पडला.
