अहिल्यानगर : प्रतिनिधी
राष्ट्रवादी शरदचंद्र पवार पक्षाचे अहिल्यानगर दक्षिण लोकसभा मतदारसंघाचे खासदार निलेश लंके यांची प्रकृती बिघडली आहे, त्यामुळे त्यांना ४ दिवसांपूर्वी पुण्यातील रुबी हॉल क्लिनिकमध्ये दाखल करण्यात आले आहे. त्यांची प्रकृती सध्या सुधारली असल्याची माहिती समोर आली आहे. आता दोन दिवसांनंतर त्यांना रुग्णालयातून डिस्चार्ज देण्यात येणार असल्याची माहिती समोर आली आहे.
निलेश लंके यांना काही दिवसांपूर्वी प्रकृती अस्वस्थ झाल्यामुळे उपचारासाठी रुग्णालयात दाखल करण्यात आले होते. यानंतर त्यांनी सोशल मीडियाद्वारे आपली तब्येत चांगली असल्याची माहिती दिली होती. लंके यांनी म्हटले होते की, दैनंदिन कार्यक्रमांच्या दगदगीमुळे माझी प्रकृती थोडी अस्वस्थ झाली होती. मात्र योग्य वेळी उपचार घेतल्यामुळे आता प्रकृती स्थिर असून काळजीचे कोणतेही कारण नाही. आपल्या सदिच्छा, प्रेम आणि आशीर्वादामुळे मी लवकरच पुन्हा आपल्या सेवेत रुजू होईल.
निलेश लंके यांच्या तब्येतीत सुधारणा व्हावी यासाठी त्यांच्या समर्थकांनी आज नाशिकमधील काळाराम मंदिरात पूजा केली. यावेळी त्यांची तब्येत पूर्ववत होण्यासाठी समर्थकांनी काळारामाकडे साकडं घातलं. यावेळी दुग्धाभिषेकही करण्यात आला. तसेच आज बीडचे खासदार बजरंग बप्पा सोनवणे यांनी निलेश लंके यांची भेट घेत त्यांच्या तब्येतीची विचारपूस केली. दोन दिवसांत लंके यांना रुग्णालयातून घरी सोडले जाणार आहे. दरम्यान, निलेश लंके हे अहिल्यानगर दक्षिण मतदारसंघाचे खासदार आहेत.
