बीड: प्रतिनिधी
जातीपातीच्या जिवावर जो राज्य करू इच्छितो, जो माणूस मोठा होऊ इच्छितो त्याला भविष्य नाही’, असे विधान राज्याच्या पर्यावरण मंत्री पंकजा मुंडे यांनी केले. त्यांनी दुष्काळाचा एकजुटीने मुकाबला करण्याचे आवाहनही उपस्थितांना केले. यावेळी त्यांनी फ्रान्समध्ये होत असलेल्या हिंसाचाराचे उदाहरण देत जेन झींबद्दल भाष्य केले.
दसरा मेळाव्यात बोलताना पंकजा मुंडे म्हणाल्या, तुम्ही टीव्ही बघता की नाही, रिल्स बघता की नाही? पॅरिसची बातमी, फ्रान्स जळतोय. तिकडे इराणचे युद्ध, रशियाचे युद्ध; पण आपल्याला देशात अशी तरुण पिढी नको, ज्यांच्यामध्ये देशभक्ती. ज्यांच्यामध्ये देशाचा आदर नाही. त्यांच्या रक्तात देशभक्तीचे टॉनिक टाकण्याची गरज आहे. स्वत:चा देश आणि घर जाळून आंदोलन करणारे लोक नको आहेत. जयप्रकाश नारायण यांच्या चळवळीत देशभक्ती रक्तात भिनवलेले सैनिक देशाला हवेत आहेत. तुम्ही जेन झी आहात. तुम्हाला जेन झींचे नेतृत्व करायचे तर दे मुद्यावरच होईल. गुद्याने होणार नाही.
संकट येत तेव्हा जातींच्या भिंती एका टिचकीमध्ये तुटून जातात. दुष्काळ श्रीमंत आणि गरिबावर वेगळा येत नाही. ऊन गरिबावर आणि श्रीमंतावर वेगळे पडत नाही. तहान गरीब आणि श्रीमंताला वेगळी लागत नाही. जनावरांचा चारा गरीब आणि श्रीमंतांसाठी वेगळा लागत नाही , असे पंकजा मुंडे म्हणाल्या.
या दुष्काळामध्ये जाती-धर्माच्या भिंती आम्हाला तोडायच्या आहेत. मी तोडल्या आहेत. मी अंतरवाली सराटी दत्तक घेतले आहे आणि मी अंतरवाली सराटीचा विकास करणार आहे. माझ्या बीड जिल्ह्यातील प्रत्येक गावासारखे प्रेम अंतरवालीवर करणार आहे, असे भाष्य त्यांनी केले.
अजेंडा नसलेला माणूस विखारी दिशा देतो
पंकजा मुंडे म्हणाल्या की, जातीपातीच्या जिवावर जो राज्य करू इच्छितो, जो माणूस मोठा होऊ इच्छितो त्याला भविष्य नाही. कोणताही अजेंडा असलेला माणूस हा देशाला दिशा नाही देत. तो विचारी दिशा देत नाही, तो विषारी आणि विखारी दिशा देतो.
हाही दुष्काळ हाताळू. मी पर्यावरण मंत्री आहे. सीएसआरमधून प्रत्येक गावापर्यंत पाणी पोहोचवण्यासाठी, गुरांसाठी चारा पोहोचवण्यासाठी, शेतक-याला अनुदान मिळवून देण्यासाठी आमचे नेतृत्व पंतप्रधान नरेंद्र मोदी आणि मुख्यमंत्री देवेंद्र फडणवीस यांच्याबरोबर काम करून तुमची सावली बनण्याचे काम करेन, हे माझे वचन आहे, अशी भूमिका पंकजा मुंडे यांनी मांडली.
