परभणी : न्यायालयीन कर्मचा-यांच्या प्रलंबित वेतनवाढीच्या प्रश्नावर आरपारची लढाई लढण्यासाठी परभणी जिल्ह्यातील चारही न्यायालयीन कर्मचारी संघटना आणि सेवानिवृत्त कर्मचारी संघाने रविवार, दि. १३ सप्टेंबर रोजी ऐतिहासिक एकजूट दाखवली. अभी नही, तो कभी नही या आक्रमक घोषणेसह आयोजित केलेल्या या विशेष संयुक्त बैठकीत आंदोलनाचा पहिला टप्प्यात १६ सप्टेंबर रोजी काळी फीत आंदोलन करण्याचा निर्णय घेण्यात आला.
शहरातील येलदरकर कॉलनी येथील श्री दक्षिणमुखी हनुमान मंदिर परिसरात प्रचंड उत्साहात आणि शेकडो कर्मचा-यांच्या उपस्थितीत पार पडलेल्या बैठकीत परभणी जिल्हा न्यायालयीन कर्मचारी संघटना (गट-क) चे अध्यक्ष अमृत कदम यांनी शासनाचे लक्ष वेधण्यासाठी आंदोलनाच्या पहिला टप्प्यात १६ सप्टेंबर रोजी होणा-या काळी फीत लावून कामकाज आंदोलनात करावे आणि शासनाचा निषेध नोंदवावा, असे आवाहन केले. या पहिल्या टप्प्यात सर्वांनी १०० टक्के सहभाग नोंदवण्याचा निर्धार यावेळी करण्यात आला.
राज्य महासंघाचे सचिव विनोद पाथरकर यांनी समान काम, समान वेतन या विषयावर मार्गदर्शन करत एक कर्मचारी, एक आवाज, एकजूट आपली ताकद! असा बुलंद नारा दिला. निवृत्त न्यायालय कर्मचारी संघाचे पदाधिकारी सुनील मुदगलकर यांनी उपस्थितांना अनमोल मार्गदर्शन केले. यासोबतच मोहनराव कुलकर्णी, गोपाळ टाक, सचिन गौंडगावकर, अशोक सूर्यवंशी यांनी मनोगत व्यक्त करून या लढ्याला बळ दिले.
अमृत कदम, शिवराज रगटे, लिंबाजीराव गरुड आणि विजय कदम यांच्या एकत्रित पुढाकाराने ही ऐतिहासिक बैठक पार पडली. सूत्रसंचालन अनिल दळवी यांनी केले, तर उपस्थितांचे आभार गणेश शिवलाड यांनी मानले. यशस्वीतेसाठी सुशील कदम, भरत खांडे, रवी क्षीरसागर, मोहन मुंढे, कोंडिबा उजगरे, मितीन खेरुडकर, सुनील डाके, अविनाश तम्मेवार, श्रीधर क-हाळे, गजानन चव्हाण यांच्यासह अनेक न्यायालयीन कर्मचा-यांनी विशेष परिश्रम घेतले.
