मुंबई : प्रतिनिधी
अमेरिका आणि इराणमधील युद्ध संपल्यानंतर देशांतर्गत बाजारात चांगले दिवस येतील, अशी आशा गुंतवणूकदारांना होती. मात्र प्रत्यक्षात आज बाजारपेठेत याच्या अगदी उलट चित्र पाहायला मिळाले. शेअर बाजारात घसरणीचे वादळ आले असून सोन्या-चांदीचे दरही लक्षणीयरीत्या कोसळले आहेत.
शेअर बाजाराचा विचार केला तर गेल्या ५ दिवसांपासून देशांतर्गत बाजारात सुरू असलेल्या सलग तेजीला आज ब्रेक लागला. सेन्सेक्स ८०० पेक्षा जास्त अंकांनी घसरून ७६,५५७ च्या पातळीवर आला, तर निफ्टी देखील २०० हून अधिक अंकांच्या घसरणीसह २३,९३६ वर पोहोचला.
बाजार क्रॅश होण्यामागे जागतिक आयटी कंपनी ‘एक्सेन्चर’ने कमकुवत आऊटलुक जाहीर केल्यामुळे निर्माण झालेला दबाव मुख्य ठरला, ज्यामुळे गुंतवणूकदारांनी टीसीएस, इन्फोसिस, एचसीएल टेक आणि टेक महिंद्रा यांसारख्या मोठ्या आयटी शेअर्समध्ये जोरदार विक्री सुरू केली. बाजार तज्ज्ञांच्या मते, परदेशी गुंतवणूकदारांची विक्री आणि गेल्या काही दिवसांतील तेजीनंतर झालेली नफावसुली हे बाजार घसरण्याचे दुसरे मोठे कारण आहे. याशिवाय जागतिक आर्थिक अनिश्चितता आणि भू-राजकीय चिंतांनी देखील गुंतवणूकदारांचा आत्मविश्वास कमकुवत केला.
सोन्या-चांदीच्या किमतीतही घसरण
दुसरीकडे, आंतरराष्ट्रीय बाजारापासून ते देशांतर्गत बाजारापर्यंत सोन्या-चांदीच्या किमतींमध्ये मोठी घसरण झाली आहे. देशांतर्गत बाजारपेठेत म्हणजेच एमसीएक्सवर सोन्याची किंमत प्रति १० ग्रॅम ५,३५० रुपयांच्या घसरणीसह १,४६,२४० रुपयांवर आली आहे, तर चांदीचा भाव प्रति किलोग्रॅम ८,८९९ रुपयांच्या घसरणीसह २,२८,७२१ रुपयांवर आला आहे. आंतरराष्ट्रीय बाजारात स्पॉट गोल्ड ०.६ टक्क्यांनी घसरून ४,१८४.३३ डॉलर प्रति औन्सवर आले, तर ऑगस्ट डिलिव्हरीचे अमेरिकन गोल्ड फ्युचर्स १ टक्क्याने तुटून ४,२०२.१० डॉलरवर पोहोचले. तसेच स्पॉट सिल्वर १.५ टक्क्यांच्या घसरणीसह ६४.८३ डॉलर प्रति औन्सवर व्यवहार करत आहे.
डॉलर आणि फेडच्या भूमिकेचाही परिणाम
वैश्विक स्तरावर सोन्याच्या किमतीत सातत्याने घट होत असून ते सलग तिस-या आठवड्यात घसरणीसह बंद होण्याच्या मार्गावर आहे. मजबूत डॉलर आणि फेडच्या कडक भूमिकेमुळे किमतींवर मोठा दबाव वाढला आहे. दुसरीकडे कच्च्या तेलाच्या किमती कमी झाल्यामुळे महागाईबाबतची चिंता कमी झाली आहे, ज्याचा फटका बुलियन मार्केटला बसला. अमेरिकन फेडरल रिझर्व्हने बुधवारी आपले व्याजदर स्थिर ठेवलेत.
