मुंबई : प्रतिनिधी
मुख्यमंत्री देवेंद्र फडणवीस हे मराठवाड्यातील लातूर, धाराशिव आणि पश्चिम महाराष्ट्रातील सोलापूर जिल्ह्यातील दुष्काळी भागाला भेट देत आहेत. दुष्काळाची भीषणता, दाहकता त्यांनी पाहिली. सरकार शेतक-यांच्या पाठीशी असल्याचे त्यांनी या दौ-यात जाहीर केले. त्याचवेळी काँग्रेस नेते विजय वडेट्टीवार यांनी पॅकेजवरून मुख्यमंर्त्यांना घेरण्याचा प्रयत्न केला. मागच्या ३१,६२८ कोटींच्या पॅकेजचे काय झाले? असा थेट सवाल त्यांनी फडणवीस यांना विचारला. ओला दुष्काळाचे पैसे आणि पुण्यश्लोक अहिल्यादेवी होळकर कर्जमुक्ती योजनेत उर्वरीत शेतक-यांना अद्याप लाभ न मिळाल्यावरून त्यांनी सरकारवर निशाणा साधला.
७ ऑक्टोबर २०२५ रोजी मुख्यमंत्री देवेंद्र फडणवीस यांनी पॅकेजची घोषणा केली होती. ३१,६२८ कोटींच्या पॅकेजची घोषणा केली होती. गेल्या वर्षी अतिवृष्टीमुळे राज्यातील २९ जिल्ह्यातील २५३तालुक्यातील ६८.६९ लाख हेक्टर जमीन बाधित झाली होती. मोठे नुकसान झाले होते. शेतक-यांच्या हातातून पिके गेली होती.
३१,६२८ कोटींच्या पॅकेजमधून सरकारने केवळ ९९ लाख रुपये दिले. गेल्या पॅकेजमध्ये सरकारने केवळ १५,६६१ कोटी रुपये खर्च झाला. म्हणजे इतकी मोठी घोषणा करून निम्मेच पैसे शेतक-यांच्या पदरात पडले. म्हणजे तुम्ही पॅकेजची घोषणा करणार, पण ते शेतक-यांच्या खात्यात, हातात गेले पाहिजेत ना, असा टोला विजय वडेट्टीवार यांनी लगावला.
किमान ५० हजारांची मदत द्या
मुख्यमंत्री, उपमुख्यमंत्री, मंत्रिमंडळ पाहणी दौरा करणार, फिरून येणार. पण शेतक-यांना तुम्ही काय देणार आहात. त्यांच्या डोळ्यांम अश्रू आहेत. ते पुसण्याचे काम सरकारने केले पाहिजे. ५० हजारांची किमान मदत केली पाहिजे. रोजगार हमीची कामं सुरू केली पाहिजेत. सर्व प्रकारचे कर्ज कर्ज माफ व्हावं. पीक कर्ज असेल वा इतर कर्ज माफ करा. शेतात काही पिकणारच नसेल तर शेतकरी कुठून भरपाई करणार. तातडीने पंचनामे करा. दुष्काळी स्थितीच्या पार्श्वभूमीवर तीन दिवसाचे विशेष अधिवेशन घेऊन मदत पैकेजची घोषणा करा विजय वडेट्टीवार यांची मागणी कर्जातून शेतक-यांना मुक्त करावे. दोन लाखांपर्यंत कर्जमाफीची घोषणाही पोकळ निघाली. कोणताही शेतकरी कर्जातून मुक्त झाला नाही. शेतकरी कर्जमुक्त झाला नाही. त्याचा सातबारा अजून कोरा झाला नाही असा आरोप वडेट्टीवार यांनी केला.
शक्तिपीठ महामार्गाची काय गरज?
वाढवण बंदर प्रकल्पावरून त्यांनी सरकारवर निशाणा साधला. या प्रकल्पासाठी सरकारने साडेतेवीस हजार कोटींची निविदा काढली. हे बंदर सरकारने अदाणीला दिला. म्हणजे मालकी अदाणींची आणि सरकारच्या तिजोरीतून त्यासाठी पैसा दिला जाणार असा आरोप त्यांनी केला. हे पैसे शेतक-यांना द्या. शक्तिपीठ महामार्गाची काय गरज आहे. हा पैसा शेतक-यांकडे वळला तर दुष्काळावर मात करता येईल असे विजय वडेट्टीवार म्हणाले.
