जळगाव : प्रतिनिधी
जळगाव जिल्ह्यातील चोपडा तालुक्यातील वडती गावात एका जन्मदात्या बापाने स्वत:च्या दोन निष्पाप लेकरांवर झोपेत असताना कु-हाडीने जीवघेणा हल्ला केल्याची धक्कादायक घटना रविवारी सकाळी उघडकीस आली. या अमानुष हल्ल्यात १३ वर्षीय मीरा हिचा जागीच मृत्यू झाला, तर तिचा ११ वर्षीय भाऊ रामू गंभीर जखमी झाला आहे. त्याच्यावर रुग्णालयात उपचार सुरू असून त्याची प्रकृती चिंताजनक असल्याची माहिती वैद्यकीय सूत्रांनी दिली आहे.
प्राथमिक माहितीनुसार, रविवारी पहाटेच्या सुमारास दोन्ही मुले घरात गाढ झोपेत होती. याचवेळी त्यांचे वडील सुभाष गोपाळ भिलाला (वय ५०) याने हातातील कु-हाडीने दोन्ही मुलांवर अचानक हल्ला केला. झोपेत असल्यामुळे मुलांना स्वत:चा बचाव करण्याची कोणतीही संधी मिळाली नाही. डोक्यावर आणि शरीरावर झालेल्या गंभीर वारांमुळे मीराचा जागीच मृत्यू झाला, तर रामू गंभीर जखमी अवस्थेत रक्ताच्या थारोळ्यात पडलेला आढळून आला.
घटनेची माहिती मिळताच शेजारी आणि ग्रामस्थांनी घटनास्थळी धाव घेतली. गंभीर जखमी रामूला तातडीने स्थानिक रुग्णालयात दाखल करण्यात आले. प्राथमिक उपचारांनंतर त्याची प्रकृती चिंताजनक असल्याने पुढील उपचारांसाठी उच्चस्तरीय रुग्णालयात हलविण्यात आले. डॉक्टरांकडून त्याच्यावर अतिदक्षता विभागात उपचार सुरू असून प्रकृतीवर बारकाईने लक्ष ठेवण्यात येत आहे.
हल्ल्यानंतर आरोपीचे जंगलात पलायन
हल्ला केल्यानंतर आरोपी सुभाष भिलाला हा जवळील जंगलाच्या दिशेने फरार झाला. घटनेची माहिती मिळताच अडावद पोलिस ठाणे येथील अधिकारी आणि कर्मचा-यांनी घटनास्थळी धाव घेतली. पोलिसांनी परिसराची नाकेबंदी करून व्यापक शोधमोहीम राबवली. काही तासांच्या अथक प्रयत्नांनंतर आरोपीला ताब्यात घेण्यात आले असून त्याच्याकडे हल्ल्यामागील कारणाबाबत कसून चौकशी सुरू आहे.
