सोलापूर : प्रतिनिधी
मोहोळ हा भाजपचा आणि विशेषत: माजी आमदार राजन पाटील यांचा बालेकिल्ला मानला जातो. मात्र, या निवडणुकीत शिवसेनेने या बालेकिल्ल्याला मोठे खिंडार पाडले आहे. २२ वर्षीय सिद्धी वस्त्रे यांनी भाजपच्या शीतल क्षीरसागर यांचा १७० मतांच्या फरकाने पराभव केला. या निकालाने सोलापूर जिल्ह्यातील भाजपच्या गोटात कमालीची अस्वस्थता पसरली आहे. नगराध्यक्ष पदासोबतच नगरपरिषदेच्या एकूण २० जागांपैकी ९ जागांवर शिवसेनेने विजय मिळवत आपले निर्विवाद वर्चस्व सिद्ध केले आहे.
राजकारण बाजूला ठेवून शहराचा विकास करणार – सिद्धी वस्त्रे
विजयानंतर माध्यमांशी संवाद साधताना नवनिर्वाचित नगराध्यक्ष सिद्धी वस्त्रे भावूक झाल्या होत्या. त्या म्हणाल्या की, हा विजय म्हणजे मोहोळच्या जनतेने माझ्यावर टाकलेली मोठी जबाबदारी आणि दाखवलेला विश्वास आहे. निवडणूक प्रचारादरम्यान माझ्या वयावरून आणि अनुभवावरून माझ्यावर अनेक टीका करण्यात आल्या. मात्र, आजच्या निकालाने त्या सर्व टीकेला चोख उत्तर दिले आहे. आता राजकारण बाजूला ठेवून शहराचा विकास आणि जनतेच्या समस्या सोडवणे हीच माझी प्राथमिकता असेल.
सौरभ तायडे हे सर्वात कमी वयाचे नगराध्यक्ष
दरम्यान, सिंदखेड राजा नगर परिषदेत राष्ट्रवादी काँग्रेस शरदचंद्र पवार गटाचे सौरभ तायडे हे सर्वात कमी वयाचे नगराध्यक्ष ठरले आहेत. त्यांचे वय २१ वर्ष १० महीने आहे. युवा उमेदवार सौरभ विजय तायडे यांनी अवघ्या १६९ मतांच्या फरकाने विजय मिळवला. ते सर्वात कमी वयाचे नगराध्यक्ष ठरले आहेत.
