निलंगा : प्रतिनिधी
निलंगा तालुक्यातील नणंद येथील घाडगेनगर वस्तीच्या पश्चिमेस असलेल्या पाझर तलावालगत सुरू असलेल्या कथित बेकायदेशीर मुरूम उत्खननामुळे गावाच्या सुरक्षिततेचा प्रश्न निर्माण झाला असून संबंधितांवर तात्काळ कारवाई करावी, अन्यथा शिवसेना शेतकरी सेनेच्या वतीने तीव्र आंदोलन छेडण्यात येईल, असा इशारा जिल्हाध्यक्ष प्रा. अण्णासाहेब मिरगाळे यांनी दिला आहे.
देवसाळे यांच्या शेतालगत असलेल्या पाझर तलावाच्या पाळूला अवघ्या ५० फूट अंतरावर मागील एक महिन्यापासून दोन पोकलेन व सुमारे २५ हायवा वाहनांच्या साहाय्याने मोठ्या प्रमाणावर मुरूम उत्खनन सुरू आहे. पाळूला लागूनच उत्खनन होत असल्याने भविष्यात मुसळधार पाऊस झाल्यास तलावात पाण्याचा साठा वाढून पाळू कमकुवत होण्याची व तलाव फुटण्याची भीती व्यक्त करण्यात आली आहे. तलाव फुटल्यास घाडगे नगर वस्तीमध्ये पाणी शिरून नागरिकांच्या जीवित व मालमत्तेचे मोठे नुकसान होण्याची शक्यता असल्याचेही निवेदनात नमूद करण्यात आले आहे. तसेच उत्खननातून काढलेला मुरूम राज्य महामार्ग क्रमांक २३८ च्या कामासाठी वापरला जात असल्याचा आरोपही निवेदनाद्वारे करण्यात आला आहे.
या संदर्भात जलसंधारण विभागाचे अधिकारी शेलार यांना दूरध्वनीद्वारे माहिती देण्यात आली असून त्यांनी तात्काळ कारवाईचे आश्वासन दिल्याचे प्रा. मिरगाळे यांनी सांगितले. दरम्यान, बेकायदेशीर उत्खनन तातडीने बंद करून संबंधित कंत्राटदारावर कठोर कारवाई करण्यात यावी, अन्यथा शिवसेना शेतकरी सेनेच्या वतीने तीव्र आंदोलन करण्यात येईल, असा इशारा जलसंधारण अधिकारी तसेच तहसीलदार यांना दिलेल्या निवेदनातून देण्यात आला आहे.
