ब्युनोस आयर्स : संपूर्ण स्पर्धेत अवघा एक गोल गमावलेल्या स्पेनचा अभेद्य बचाव लिओनेल मेस्सीलाही भेदता न आल्यामुळे सलग दुसरा विश्वचषक जिंकण्याचे अर्जेंटिनाचे स्वप्न अंतिम टप्प्यावर येऊन भंगले. या पराभवानंतर मेस्सीने इन्स्टाग्रामवर इमोशनल पोस्ट केली. ३९ वर्षांच्या मेस्सीने हा त्याचा शेवटचा विश्वचषक असल्याचे संकेत आधीच दिले होते. मेस्सीच्या काळात फुटबॉल चाहत्यांनी मैदानावर अनेक चमत्कार पाहिले.
मेस्सीने २०२२ विश्वचषक, २००८ बीजिंग ऑलिम्पिक सुवर्णपदक, २०२१ आणि २०२४ कोपा अमेरिका विजेतेपदासह १९ वर्षांत १६ वेळा अर्जेंटिनाचा सर्वोत्तम खेळाडूचा पुरस्कार जिंकला आहे.
मेस्सीने आपल्या पोस्टमध्ये म्हटले आहे की, वेदना अथांग आहे आणि ही जखम भरायला वेळ लागेल. मात्र, या प्रवासातील सर्व चांगल्या आठवणी जपून ठेवण्याचा मी निर्णय घेतला आहे. सर्वस्व पणाला लावून
आम्ही जिंकलेले सामने आणि आयुष्यभर स्मरणात राहतील असे क्षण मी कायम जपून ठेवेन. संपूर्ण देशाने दिलेला पाठिंबा मी कधीही विसरणार नाही. संघातील प्रत्येक खेळाडूच्या मेहनतीमुळे आणि अथक प्रयत्नांमुळे अर्जेंटिनाने पुन्हा एकदा जगातील सर्वोत्तम संघांमध्ये आपले स्थान निर्माण केले. आज आम्ही जे काही साध्य केले आहे, त्याचे कौतुक करणेही कठीण आहे. या संघाने सलग दोन विश्वचषकांच्या अंतिम फेरीत धडक मारली, हीच मोठी कामगिरी आहे. प्रत्येक शुभेच्छा आणि संदेशाबद्दल मनापासून धन्यवाद. पुन्हा एकदा आम्ही एक देश म्हणून एकत्र आलो आणि अर्जेंटिनाचा नागरिक असल्याचा अभिमान बाळगत एकजूट झालो. तसेच, विश्वचषक जिंकल्याबद्दल स्पेनचेही अभिनंदन.
सोमवारच्या पहाटेपर्यंत रंगलेल्या फिफा फुटबॉल विश्वचषकाच्या अंतिम सामन्यात फेरान टोरेसने १०६व्या मिनिटाला गोल करून स्पेनला १६ वर्षांनंतर विश्वविजेता बनवले, या विश्वचषकातील त्याचा हा पहिला गोल आयुष्यातील सर्वांत अमूल्य गोल ठरला. या गोलने स्पेनला ट्रॉफी मिळवून दिली. दुसरीकडे, या सुंदर खेळातील महान खेळाडूंपैकी एक असलेल्या मेस्सीला डोळ्यांत निराशेचे अश्रू साठवून निरोप घ्यावा लागला. प्रेक्षक गॅलरीत बसलेल्या अर्जेंटिनाच्या समर्थकांकडे पाहत तो म्हणाला, ‘मला खूप दु:ख होत आहे. पण, प्रामाणिकपणे सांगायचे तर, प्रतिस्पर्धी संघ अधिक चांगला खेळला. आम्ही पूर्ण प्रयत्न केले होते.
