औसा : प्रतिनिधी
लातूर जिल्ह्यातील महावितरणच्या प्रत्येक शाखा कार्यालयासमोर मनसेच्या वतीने स्मार्ट मीटरची होळी आंदोलन करण्यात येणार असून पहिले आंदोलन ३ जुलै २०२६ वार शुक्रवार रोजी सकाळी ११ वाजता महावितरण शाखा कार्यालय किल्लारी (ता.औसा) येथे करण्यात येणार आहे.
राज्यात महावितरणचे अदानीकरण झाले असून स्मार्ट मीटरच्या अडून महावितरणच्या सर्वसामान्य ग्राहकाचे खिसे कापले जात आहेत. खरंतर हे स्मार्ट मीटर नाही तर याला एक प्रकारचा डिजिटल दरोडाच म्हणावा लागेल. ग्राहकाची कुठल्याही प्रकारची मागणी नसताना व त्यांची पूर्वपरवानगी न घेता महावितरणने जिल्ह्यात अनेक ग्राहकांना स्मार्ट मीटर बसविले आहे. ग्रामीण भागातील शेतकरी, शेतमजूर, सर्वसामान्य घरगुती वीज ग्राहकांना ते स्मार्ट मीटर बसवल्यापासून घरी पिठाची चक्की, मिरची कांडप, तेलाचा घाना याला जशा प्रकारे बील येते त्या प्रकारे सामान्य ग्राहकांना अव्वाच्या सव्वा बीलं येत आहे. विजेचा वापर कमी आणि बिले जास्त येत असल्याने ग्राहकाच्या मनामध्ये प्रचंड असंतोष निर्माण झाला असून जिल्हयत सगळीकडे स्मार्ट मीटरच्या विरोधात ग्राहक तक्रारी करीत आहेत.
ग्राहकांना बसत असलेला अतिरिक्त आर्थिक भुर्दंड लक्षात घेता महावितरण ते स्मार्ट मीटर काढून पूर्वीचे मीटर बसवावे व यापुढे ग्राहकावर आर्थिक भुर्दंड लादू नये. या मागणी करिता महाराष्ट्र नवनिर्माण सेना जिल्हा लातूरच्या वतीने महावितरणच्या प्रत्येक शाखा कार्यालयासमोर स्मार्ट मीटरची होळी आंदोलन करण्यात येणार आहे. त्या आंदोलनाची सुरुवात ३ जुलै २०२६ वार शुक्रवार रोजी मनसेचे जिल्हाध्यक्ष शिवकुमार नागराळे यांच्या नेतृत्वाखाली महावितरणचे शाखा कार्यालय किल्लारी ता.औसा येथे सकाळी ११ वा.करण्यात येणार आहे. त्या आशयाचे निवेदन संबंधित कार्यालयास देण्यात आले. याप्रसंगी मनसेचे जिल्हाध्यक्ष शिवकुमार नागराळे, तालुकाध्यक्ष धनराज गिरी, माजी तालुकाध्यक्ष मुकेश देशमाने, सचिव अमोल परिहार, तालुका उपाध्यक्ष महादेव गायकवाड पवार, मच्छींद्र मेंढे, महेश बिराजदार, शिवाजी कुलकर्णी, अतुल पाटील, गणेश रामपुरे, अभिषेक सोनटक्के, नामदेव गायकवाड, साईनाथ जाधव, मोरारी गायकवाड, करण खराते, अमर जाधव, अशोक बनसोडे, कामा नाईक, राहूल जाधव, महादेव गायकवाड, विकास पल्ले, करण गायकवाड, अंगद बनसोडे, अनिल खराते, दयानंद जाधव, विश्वास चव्हाण, अमित पाटील, मच्छीद्र तौर, आलोदिन शेख, बबन पाटील, इत्यादी कार्यकर्ते व पदाधिकारी उपस्थित होते.
