मुंबई : प्रतिनिधी
मुंबईजवळील मीरा रोड परिसरातील डालमिया शाळेत आज सकाळी (१५ जुलै) भीषण आग लागल्याची घटना घडली. या आगीत शाळेच्या इमारतीच्या वरच्या मजल्यावरील ग्रंथालय, सभागृह (ऑडिटोरियम), प्रयोगशाळा आणि अनेक वर्गखोल्यांचे मोठे नुकसान झाले. सुदैवाने, शाळा प्रशासनाने वेळीच विद्यार्थी आणि कर्मचा-यांना सुरक्षित बाहेर काढल्यामुळे कोणतीही जीवितहानी झाली नाही.
प्राथमिक माहितीनुसार, ही आग बुधवारी सकाळी सुमारे ६ वाजता लागली. मीरा रोडमधील इस्कॉन मंदिराजवळ असलेल्या डालमिया शाळेच्या इमारतीच्या वरच्या मजल्यातून काळ्या धुराचे मोठे लोट आकाशात पसरले होते. काही वेळातच आगीने इमारतीचा मोठा भाग वेढला.
घटनेचे अनेक व्हिडिओ सोशल मीडियावर व्हायरल झाले असून त्यामध्ये शाळेच्या इमारतीतून निघणारे धुराचे प्रचंड लोट स्पष्टपणे दिसत आहेत.
अग्निशमन विभागाच्या प्राथमिक माहितीनुसार, आग सर्वप्रथम शाळेच्या ऑडिटोरियममध्ये लागली. त्यानंतर ती सहाव्या मजल्यावरील बॅटरी बॅकअप रूममध्ये पसरली. या दोन्ही विभागांचे पूर्णपणे नुकसान झाले. आगीमुळे शाळेचे ग्रंथालय, प्रयोगशाळा आणि अनेक वर्गखोल्याही जळून खाक झाल्या असून शैक्षणिक साहित्याचे मोठे नुकसान झाले आहे.
विद्यार्थ्यांना सुरक्षित बाहेर काढले
आग लागल्याचे लक्षात येताच शाळा प्रशासनाने तातडीने सर्व विद्यार्थी, शिक्षक आणि कर्मचा-यांना इमारतीबाहेर सुरक्षित स्थळी हलवले. त्यामुळे कोणतीही जीवितहानी किंवा दुखापत झालेली नाही.
आग विझवण्यासाठी ८ गाड्या, ४ पाण्याचे टँकर
आगीची माहिती मिळताच अग्निशमन दलाच्या ८ गाड्या आणि ४ पाण्याचे टँकर घटनास्थळी दाखल झाले. उंच मजल्यांवरील आग विझवण्यासाठी हायड्रॉलिक शिड्यांचा वापर करण्यात आला. सुमारे ९० मिनिटांच्या अथक प्रयत्नांनंतर अग्निशमन दलाने आगीवर नियंत्रण मिळवले. त्यानंतरही पुन्हा आग भडकू नये म्हणून अनेक तास ‘कूलिंग ऑपरेशन’ सुरू ठेवण्यात आले.
आगीचे कारण अद्याप अस्पष्ट
या भीषण आगीचे नेमके कारण अद्याप समोर आलेले नाही. अग्निशमन विभागाने सांगितले की, कूलिंग ऑपरेशन पूर्ण झाल्यानंतर सविस्तर तपास केला जाईल. त्यानंतरच आग नेमकी कशामुळे लागली, हे स्पष्ट होईल. आगीमुळे इमारतीचे मोठ्या प्रमाणात नुकसान झाल्याने संबंधित यंत्रणांकडून आता शाळेच्या इमारतीची तपासणी केली जाणार आहे.
