पुणे : प्रतिनिधी
पिंपरी-चिंचवड येथील मोशी कचरा डेपो दुर्घटना प्रकरणात मोठी कारवाई करण्यात आली आहे. या दुर्घटनेमध्ये ९ जणांचा दुर्दैवी मृत्यू झाला. या सर्वांच्या मृत्यूला जबाबदार असणा-या कंपनीविरोधात आणि सुरक्षा अधिका-यांविरोधात गुन्हा दाखल करण्यात आला आहे. सध्या या प्रकरणाचा पोलिसांकडून तपास सुरू आहे. ८ जुलै रोजी मोशी कचरा डेपोमध्ये कच-याचा डोंगर कोसळून ही दुर्घटना घडली होती. विशेष म्हणजे गुन्हा दाखल झालेले दोन्ही आरोपी या दुर्घटनेत जखमी झाले आहेत.
ठेकेदार कंपनी अँटोनी लारा रेन्युएबल कंपनीचा प्रकल्प प्रमुख अशोककुमार सियाराम शरण गुप्ता (वय ५९) आणि सुरक्षा अधिकारी विजय रामराव सपकाळ (वय ३८) अशी गुन्हा दाखल झालेल्या आरोपींची नावे आहेत. या दोघांवर ९ कामगारांच्या मृत्यू प्रकरणी सदोष मनुष्यवधाचा तसेच १२ कामगारांच्या गंभीर दुखापतीस कारणीभूत झाल्याप्रकरणी निष्काळजीपणा या कलमांतर्गत भोसरी एमआयडीसी पोलिस ठाण्यात गुन्हा दाखल करण्यात आला आहे. महापालिकेच्या पर्यावरण विभागाचे कार्यकारी अभियंता सोहन मधुकर निकम यांनी फिर्याद दिली.
कचरा डेपोमध्ये साठणा-या कच-यावर पावसाळ्यामुळे काय धोका निर्माण होऊ शकतो? पावसामुळे कचरा डेपो ढासळू शकतो, तसेच याबाबतचे संभाव्य धोके टाळण्यासाठी आवश्यक उपाययोजना करण्याची जबाबदारी ठेकेदार कंपनीची असताना आवश्यक खबरदारीच्या उपाययोजना न केल्याने जीवितहानी झाल्याचा ठपका संबंधितांवर ठेवण्यात आला आहे. वरिष्ठ पोलिस निरीक्षक गणेश जामदार तपास करत आहेत.
