लातूर : प्रतिनिधी
लातूर शहर महानगरपालिकेचे माजी महापौर आणि शहराच्या राजकीय व सामाजिक पटलावरील एक सर्वसमावेशक नेतृत्व सुरेश (तात्या) निवृत्तीराव पवार यांचे आज, रविवारी हृदयविकाराच्या तीव्र झटक्याने निधन झाले. त्यांच्या निधनाची बातमी समजताच संपूर्ण लातूर शहरावर शोककळा पसरली आहे. एका अत्यंत मनमिळावू आणि जनसामान्यात प्रेमळ प्रतिमा असलेल्या नेत्याच्या जाण्याने, लातूरकरांनी आपल्या परिवारातील सदस्य गमावल्याची भावना निर्माण झाली आहे.
सुरेश तात्या पवार यांनी लातूरच्या विकासामध्ये मोठे योगदान दिले आहे. त्यांनी लातूर नगरपालिकेत दीर्घकाळ नगरसेवक म्हणून काम केले होते. त्यानंतर लातूर महानगरपालिका अस्तित्वात आल्यावर त्यांनी पहिले उपमहापौर आणि २०१७ मध्ये महापौर म्हणून शहराची धुरा सांभाळली. आपल्या कार्यकाळात त्यांनी शहराच्या मूलभूत प्रश्नांवर भर देत लातूरकरांची उत्तम सेवा केली होती. राजकारण करत असताना त्यांनी कधीही सर्वसामान्य लोकांपासून अंतर राखले नाही, ज्यामुळे ते अबालवृद्धांमध्ये ‘तात्या’ या नावाने अत्यंत लोकप्रिय होते.
हसतमुख स्वभाव आणि सामान्यांच्या अडीअडचणीत धावून जाण्याची वृत्ती यामुळे त्यांनी समाजात एक वेगळे स्थान निर्माण केले होते. त्यांच्या निधनाने राजकीय, सामाजिक आणि सहकार क्षेत्रात मोठी पोकळी निर्माण झाली आहे. त्यांच्या पश्चात मुले, मुलगी, सुना आणि नातवंडे असा मोठा परिवार आहे. त्यांच्यावर रविवार, १९ एप्रिल २०२६ रोजी सायंकाळी ६:०० वाजता लातूर येथील मारवाडी स्मशानभूमीमध्ये अंत्यसंस्कार करण्यात आले.
