जौनपूर (उत्तर प्रदेश): उत्तर प्रदेशातील जौनपूरमध्ये अवघ्या काही दिवसांपूर्वी महामार्गावर एका नवरदेवाची फिल्मी स्टाईलने गोळ्या झाडून हत्या करणाऱ्या मुख्य आरोपीला पोलिसांनी कंठस्नान घातले आहे. रवी यादव असे या कुख्यात गुंडाचे नाव असून, त्याच्यावर पोलिसांनी १ लाख रुपयांचे बक्षीस जाहीर केले होते. आज झालेल्या एका अटीतटीच्या पोलीस चकमकीत (Encounter) तो ठार झाला. या कारवाईत पोलिसांचे एक इन्स्पेक्टरही जखमी झाले आहेत.
महामार्गावर रचला होता रक्ताचा खेळ
१ मे रोजी आझाद बिंद नावाचा तरूण मोठ्या उत्साहात आपली बरात घेऊन निघाला होता. फुलांनी सजवलेल्या गाडीत नवरदेव बसलेला असतानाच, रवी यादव आणि त्याच्या साथीदारांनी हायवेवर गाडी अडवली. अगदी एखाद्या चित्रपटात शोभावा अशा पद्धतीने गाडीवर बेछूट गोळीबार करण्यात आला. या हल्ल्यात काही सेकंदांतच फुलांनी सजलेली कार रक्ताने माखली आणि नवरदेवाचा जागीच मृत्यू झाला. ज्या घरात लग्नाचे सनई-चौघडे वाजत होते, तिथे एका क्षणात आक्रोश पसरला. या घटनेने संपूर्ण उत्तर प्रदेश हादरला होता.
जुन्या वैमनस्यातून हत्येचा कट
पोलीस तपासात समोर आले की, मुलीचा एक नातेवाईक प्रदीप बिंद या लग्नाच्या विरोधात होता. त्यानेच आझादचा काटा काढण्यासाठी रवी यादव आणि भोला राजभर या गुंडांना सोबत घेऊन हा रक्तरंजित कट रचला होता. लग्नाआधी आझादला धमक्याही देण्यात आल्या होत्या.
अशी झाली पोलीस चकमक
नवरदेवाच्या हत्येनंतर फरार झालेल्या रवी यादवचा पोलीस कसून शोध घेत होते. आज पोलिसांना तो एका भागात लपल्याची खात्रीशीर माहिती मिळाली. पोलिसांनी वेढा घालताच रवी यादवने पोलिसांवर बेछूट गोळीबार सुरू केला. पोलिसांनी स्वतःचा बचाव करत प्रत्युत्तरा दाखल गोळ्या झाडल्या. यात एक गोळी रवी यादवच्या जबड्याला लागली आणि तो गंभीर जखमी झाला. त्याला तातडीने जिल्हा रुग्णालयात नेण्यात आले, मात्र डॉक्टरांनी त्याला मृत घोषित केले.या चकमकीत उत्तर प्रदेश पोलिसांचे एक इन्स्पेक्टरही जखमी झाले असून त्यांच्यावर उपचार सुरू आहेत. या प्रकरणातील मुख्य सूत्रधार प्रदीप बिंद आणि त्याचा दुसरा साथीदार भोला राजभर हे अद्याप फरार असून पोलीस त्यांचा शोध घेत आहेत. १ लाखाच्या इनामी गुंडाचा खात्मा केल्यामुळे जौनपूर पोलिसांनी मोठी कामगिरी फत्ते केली आहे.
