लातूर : प्रतिनिधी
उच्च न्यायालयाच्या निर्देशाप्रमाणे व लातूर शहर महानरगपालिका आयुक्त राहुल कुलकर्णी यांच्या आदेशानुसार शहरातील फूटपाथवरील अतिक्रमणे हटवून फुटपाथ मोकळे करण्याचे काम हाती घेण्यात आले आहे. यामुळे आगामी काही दिवसात शहरातील सर्व फुटपाथ मोकळा श्वास घेऊ शकणार आहेत. अतिक्रमण विभागाच्या वतीने ही मोहीम सुरू करण्यात आली आहे. त्यानुसार दयानंद महाविद्यालयाचे गेट ते ज्ञानप्रकाश शाळेसमोरील अतिक्रमण हटवून यापूर्वीच फुटपाथ खुला करण्यात आला आहे.सोमवारी दि. १० रोजी पीव्हीआर चौक ते कृष्णा मंगल कार्यालयासमोरील अतिक्रमण काढण्यात आले आहे. शहराच्या विविध भागात याच पद्धतीने कार्यवाही करून अतिक्रमणे काढली जाणार आहेत. यामुळे फुटपाथ नागरिकांना चालण्यासाठी मोकळे होणार आहेत.
शहरातील व्यावसायिक, व्यापारी, हातगाडे चालक यांनी उच्च न्यायालयाच्या आदेशाचे पालन करावे. फुटपाथ नागरिकांना चालण्यासाठी खुले करावेत. अन्यथा मनपाच्या वतीने साहित्य जप्त करून कडक कार्यवाही केली जाईल. व्यावसायिकांनी स्वत: फुटपाथ मोकळे करून मनपास सहकार्य करावे, असे आवाहन पालिकेच्या वतीने करण्यात आले आहे.
शहरातील सार्वजनिक पदपथ (फुटपाथ) अतिक्रमणमुक्त करुन नागरिकांच्या सुरक्षित पायी चालण्याच्या मूलभूत हक्काचे संरक्षण करा तसेच केंद्रीय गृहनिर्माण व शहरी व्यवहार मंत्रालय यांच्या ‘कंप्लिट स्ट्रीट्स गाईडलाईन्स’ ची अंमलबजावणी करावी व महाराष्ट्र महानगरपालिका अधिनियम १९४९ अंतर्गत वैधानिक कर्तव्य पार पाडावे, अशी नोटीस अॅड. जगन्नाथ चित्ताडे, आयुक्त मुंबई उच्च न्यायालय, लातूर यांनी लातूर शहर महानगरपालिका आयुक्तांना बजावली आहे.
ही नोटीस प्राप्त झाल्यापासून १५ दिवसांच्या आत आवश्यक ती कार्यवाही करुन त्याचा लेखी अहवाल आमच्या कार्यालयास सादर करावा. जर वरील मुदतीत आवश्यक कार्यवाही करण्यात आली नाही तर संबंधित अधिका-यांविरुद्ध वैयक्तिक जबाबदारी निश्चित करणे, न्यायालयीन आदेश, नुकसानभरपाई, खर्च व इतर योग्य दिलासा मिळण्यासाठी आवश्यक ती सर्व कायदेशीर कार्यवाही करण्यात येईल. त्यासाठी महानगरपालिका आयुक्त पूर्णपणे जबाबदार राहातील. ही नोटीस महाराष्ट्र महानगरपालिका अधिनियिम १९४९ च्या कलम ४८७ मधील तरतूदींचे पालन म्हणून देण्यात आल्याचे अॅड. जगन्नाथ चित्ताडे, आयुक्त मुंबई उच्च न्यायालय, लातूर यांनी नोटीसमध्ये नमुद केले आहे. त्यानूसार मनपा प्रशासनाने शहरातील फुटपाथवरील अतिक्रमण काढण्याची मोहीम हाती घेतली आहे.
