मुंबई : प्रतिनिधी
१ मे रोजी संपूर्ण जगभरात प्रदर्शित झालेल्या ‘राजा शिवाजी’ या ऐतिहासिक चित्रपटाने बॉक्स ऑफिसवर इतिहास रचला आहे. जगभरात तब्बल १३० कोटी रुपयांहून अधिक कमाई करणारा हा पहिलावहिला मराठी चित्रपट ठरला. या घवघवीत यशानंतर मराठीसह बॉलिवूडमधील अनेक दिग्गज कलाकारांनी अभिनेते रितेश विलासराव देशमुख यांच्यावर कौतुकाचा वर्षाव करत आहेत. दरम्यान, बॉलिवूडची ग्लॅमरस क्वीन शिल्पा शेट्टी हिने ‘राजा शिवाजी’चित्रपट पाहिल्यावर रितेश यांची चक्क नजरच काढली.
जिनिलिया देशमुख यांनी शिल्पाच्या वाढदिवसानिमित्त रितेशसोबतचा फिटनेस क्वीनचा व्हीडीओ शेअर केला आहे. या व्हीडीओमध्ये दिसते की, शिल्पा शेट्टी रितेश देशमुख यांना कोणाचीही वाईट नजर लागू नये म्हणून प्रेमाने त्यांच्या कानामागे ‘काळा टिळा’ लावत आहे. यानंतर शिल्पाने पाठीवर शाबासकीची थाप देत रितेश यांना कडकडून मिठी मारली. ‘राजा शिवाजी’ चित्रपटाची झलक पाहिल्यानंतर शिल्पा शेट्टी भारावून गेली होती आणि तिने अशा भावनिक पद्धतीने रितेश यांचे कौतुक केले होते.
रितेश यांची शिल्पासाठी खास पोस्ट!
इंडस्ट्रीमध्ये रितेश देशमुख यांची सर्वांशीच खूप घट्ट मैत्री आहे. शिल्पा शेट्टीला वाढदिवसाच्या शुभेच्छा देताना रितेश यांनी लिहिले, ‘वाढदिवसाच्या खूप-खूप शुभेच्छा शिल्पा. तुम्ही कायम अशाच आनंदी राहा. आणि हे वर्षही तुमच्यासाठी सुखाचं ठरू दे. तुम्ही नेहमीच मला खंबीर पाठिंबा दिला आहे. खूप खूप प्रेम.’
