परभणी : राज्यातील शेतकरी दुष्काळामुळे पीक हातचे गेल्याने आर्थिक अडचणीत सापडला आहे. दुसरीकडे डोक्यावर कर्जाचा डोंगर वाढत आहे. अशा परिस्थितीत शासनाने केवळ ५ हजार रुपये खात्यावर जमा करून शेतक-यांची थट्टा केली असल्याची टीका वंचित बहुजन आघाडीच्या पदाधिका-यांनी केली. यावेळी चटणी-भाकरी खात सरकारच्या धोरणांचा तीव्र निषेध करण्यात आला. या आंदोलनाने नागरिकांचे लक्ष वेधून घेतले होते.
शेतक-यांची आर्थिक परिस्थिती अत्यंत बिकट असताना तुटपुंजी आर्थिक मदत देऊन शासन शेतक-यांची थट्टा करत असल्याचा आरोप यावेळी वंचित बहुजन आघाडीच्या पदाधिका-यांनी केला. शेतक-यांच्या अडचणी समजून घेण्याऐवजी तुटपुंज्या मदतीच्या माध्यमातून सरकार आपली जबाबदारी पार पाडत असल्याचे चित्र निर्माण झाले आहे. शेतक-यांना प्रत्यक्षात भरीव आर्थिक मदतीची गरज असताना ५ हजारांची मदत म्हणजे शेतक-यांच्या जखमेवर मीठ चोळण्यासारखे असल्याची भावना आंदोलनकर्त्यांनी व्यक्त केली.
या पार्श्वभूमीवर वंचित बहुजन आघाडीच्या वतीने जिल्हाधिकारी कार्यालयासमोर पदाधिकारी व कार्यकर्त्यांनी चटणी-भाकर खाऊन शासनाच्या शेतकरीविरोधी धोरणांचा निषेध नोंदविला. दिवाळी हा आनंदाचा आणि उत्साहाचा सण असला तरी शेतक-यांपुढे आर्थिक समस्या निर्माण झाली आहे. अशा परिस्थितीत शासनाने केवळ ५ हजारांची मदत देऊन सरकारने आपली पाठ थोपटून घेणे योग्य नाही, अशी भूमिका वंचित बहुजन आघाडीचे परभणी जिल्हाध्यक्ष प्रमोद कुटे यांनी घेत सरकारच्या धोरणांचा निषेध नोंदवला. यावेळी महिला जिल्हाध्यक्ष सुनीता साळवे, महासचिव मुजफर खान, मानवत तालुकाध्यक्ष राऊत, रंजीत मकरंद, एन.जी. खंदारे. मधुकर बनकर, अनिल राठोड, सतीश वाकळे, दिलीप मोरे यांच्यासह पदाधिकारी व कार्यकर्त्यांनी शेतक-यांना दिलासा देण्यासाठी शासनाने तातडीने ठोस निर्णय घ्यावेत. आर्थिक संकटात सापडलेल्या शेतक-यांना भरीव मदत द्यावी. शेतमालाला योग्य दर मिळण्यासाठी प्रभावी उपाययोजना कराव्यात, अशी मागणी यावेळी करण्यात आली.
