मुंबई : प्रतिनिधी
क्रिकेटचा देव मानला जाणा-या सचिन तेंडुलकरची मुलगी सारा तेंडुलकर सतत सोशल मीडियावर चर्चेत असते. साराने मॉडेल, वेलनेस उद्योजिका आणि पोषणतज्ज्ञ म्हणून आपली वेगळी ओळख निर्माण केली आहे. इन्स्टाग्रामवर साराचे ७.४ दशलक्षांहून अधिक फॉलोअर्स आहेत. सोशल मीडियाच्या माध्यमातून सारा चांगली कमाई करते. सारा एका इन्स्टाग्राम पोस्टमधून जवळपास २५ ते ३० लाख रुपये कमावते. त्यामुळे ती देशातील सर्वाधिक मानधन घेणा-या इन्फ्लुएन्सर्सपैकी एक आहे, असे म्हणायला हरकत नाही.
१२ ऑक्टोबर १९९७ रोजी तिचा जन्म झाला असून तिने लंडनमध्ये शिक्षण घेतले आहे. युनिव्हर्सिटी कॉलेज लंडनमधून तिने क्लिनिकल आणि पब्लिक हेल्थ न्यूट्रिशनमध्ये पदव्युत्तर पदवी प्राप्त केली आहे. इतकंच नव्हे तर सचिन तेंडुलकर फाऊंडेशनमध्ये ती संचालिकासुद्धा आहे. हे फाऊंडेशन क्रीडा, आरोग्य आणि शिक्षण उपक्रमांवर लक्ष केंद्रित करते.
साराची एकूण संपत्ती जवळपास एक ते दीड कोटी रुपये इतकी आहे. विविध ब्रँड्सच्या जाहिराती, मॉडेलिंग आणि सारा प्लॅनर्स या ऑनलाईन स्टोअरमधून तिची कमाई होते. तिने अजिओ लक्स आणि लानीज यांसारख्या मोठ्या ब्रँड्ससोबत काम केले आहे.
नुकतेच तिला टुरिझम ऑस्ट्रेलियाच्या जागतिक ‘१३० दशलक्ष डॉलर्स’ मोहिमेसाठी भारतीय चेहरा म्हणून निवडण्यात आले होते. यावेळी सारा म्हणाली, ‘ऑस्ट्रेलियात असं काहीतरी नक्की आहे, जे मला सतत इथे बोलावत राहतं. इथे पुन्हा पुन्हा यायला मलाही आवडतंय. गजबजलेल्या शहरांपासून ते निवांत समुद्रकिनारे, वन्यजीवन.. अशा ब-याच गोष्टी पर्यटकांना इथे अनुभवायला मिळतात. ऑस्ट्रेलियात घालवलेल्या सुट्यांमध्ये मी सर्फिंग, स्रॉर्किंग, विविध खाद्यपदार्थ, कॉफी कल्चर यांचा भरभरून आनंद घेतला.’
याव्यतिरिक्त सारा तेंडुलकरची स्वत:ची पिलाटेसची अकॅडमी आहे. मुंबईतील अंधेरीत तिची ही अकॅडमी आहे. नुकताच तिने आपला २८ वा वाढदिवस साजरा केला. या बर्थडे सेलिब्रेशनला तिचे जवळचे कुटुंबीय आणि मित्र-मैत्रिणी उपस्थित होते
