कोलकाता: पश्चिम बंगालच्या राजकारणात २०२१ ची विधानसभा निवडणूक हा एक ऐतिहासिक टर्निंग पॉइंट ठरला. मात्र, या परिवर्तनाची बीजे २०२० मध्येच पेरली गेली होती. तृणमूल काँग्रेसच्या (TMC) सर्वेसर्वा ममता बॅनर्जी यांच्या अत्यंत विश्वासू सहकाऱ्यांपैकी एक असलेल्या शुभेंदू अधिकारी यांनी जेव्हा पक्षाला ‘रामराम’ ठोकला, तेव्हा तो केवळ एका नेत्याचा राजीनामा नव्हता, तर ममतांच्या ‘महावृक्षाला’ दिलेला पहिला मोठा धक्का होता.
२०२० चा तो ‘व्हॉट्सॲप’ मेसेज
शुभेंदू अधिकारी आणि ममता बॅनर्जी यांच्यातील वादाची ठिणगी बऱ्याच काळापासून पडली होती. मात्र, डिसेंबर २०२० मध्ये एका व्हॉट्सॲप मेसेजने संपूर्ण बंगालच्या राजकारणात खळबळ उडवून दिली. अधिकारी यांनी पक्षाच्या वरिष्ठ नेत्यांना आणि सहकाऱ्यांना केलेल्या मेसेजमध्ये स्पष्ट संकेत दिले होते की, आता त्यांचे मार्ग वेगळे झाले आहेत. “मी माझ्या निर्णयावर ठाम आहे. आता मागे वळून पाहणे शक्य नाही,” अशा आशयाचा तो मेसेज होता, ज्याने टीएमसीच्या गोटात चिंतेचे वातावरण निर्माण केले होते.
राजीनामा आणि राजकीय भूकंप
शुभेंदू अधिकारी यांनी केवळ आमदारकीचाच नाही, तर मंत्रिपदाचाही राजीनामा दिला. नंदीग्राम आंदोलनाचे नायक मानल्या जाणाऱ्या अधिकारी यांनी पक्षाला सोडचिठ्ठी देणे हा ममता बॅनर्जींसाठी वैयक्तिक आणि राजकीयदृष्ट्या मोठा पराभव मानला जात होता. शुभेंदू अधिकारी यांची नंदीग्राम आणि पूर्व मेदिनीपूर भागात प्रचंड पकड होती. त्यांच्यासोबत टीएमसीचे अनेक ग्राउंड-लेव्हल कार्यकर्ते भाजपमध्ये सामील झाले. त्यांनी ममता बॅनर्जींना त्यांच्याच बालेकिल्ल्यात (नंदीग्राम) पराभूत करण्याचे खुले आव्हान दिले होते.
ममतांच्या ‘महाबरगद’ला (महावृक्षाला) सुरुंग
ममता बॅनर्जींचे राजकीय साम्राज्य एखाद्या वटवृक्षासारखे पसरलेले होते. मात्र, शुभेंदू अधिकारी यांनी भाजपमध्ये प्रवेश केल्यानंतर परिस्थिती वेगाने बदलली. ६ वर्षांच्या या संघर्षात अधिकारी यांनी सातत्याने ममता सरकारवर भ्रष्टाचाराचे आणि घराणेशाहीचे आरोप करत जनमत तयार केले. २०२१ च्या निवडणुकीत नंदीग्राममध्ये ममता बॅनर्जींचा पराभव करून शुभेंदू अधिकारी यांनी हे सिद्ध केले की, हा ‘महावृक्ष’ आता अभेद्य राहिलेला नाही. आजही पश्चिम बंगालच्या राजकारणात शुभेंदू अधिकारी हे ममता बॅनर्जींचे सर्वात मोठे विरोधक म्हणून पाय रोवून उभे आहेत.
