पुणे : प्रतिनिधी
जिल्ह्यातील तुळापूर गावच्या हद्दीतील एका आलिशान बंगल्यात सुरू असलेल्या कथित रेव्ह पार्टीवर पुणे पोलिसांनी मध्यरात्री छापा टाकत मोठी कारवाई केली. ज्यावेळी गुन्हे शाखेकडून हा छापा टाकण्यात आला, त्यावेळी तिथे १०० च्या जवळपास मुली-मुले उपस्थित होते. धक्कादायक बाब म्हणजे सर्व मुले-मुली नशेत होते. काही अल्पवयीन मुले देखील तिथे उपस्थित होते. दारूचा मोठा साठा देखील होता.
पोलिसांनी त्यांना ताब्यात घेतले. या पार्टीचे आयोजन केलेल्याची चौकशी केली जात आहे. पुण्यात मागील काही दिवसांपासून रेव्ह पार्टीचा मुद्दा तूफान चर्चेत आहे. घटनास्थळावरून नशेसाठी वापरले जाणारे विविध पदार्थ जप्त करण्यात आले आहेत. रेव्ह पार्टीच्या ठिकाणी पोलिसांचा तपास सुरू आहे.
या रेव्ह पार्टीबद्दल तेजस्विनी सातपुते अप्पर पोलिस आयुक्त पुणे यांनी मोठी माहिती दिली. अप्पर पोलिस आयुक्त तेजस्विनी सातपुते यांनी म्हटले की, लोणीकंद पोलिस स्टेशनच्या हद्दीमध्ये तुळापूर परिसरात मध्यरात्री पार्टी सुरू होती आणि यासाठी कोणतीही परवानगी न घेता ही पार्टी सुरू होती. यावेळी १००पेक्षा जास्त मुले आणि मुली उपस्थित होते. यामध्ये अनेक तरुण २१ वर्षाच्या आतील असल्याची संभावना वाटत आहे. ज्यांनी हा बंगला उपलब्ध करून दिला त्याचा यामध्ये काही संबंध आहे का? याबाबत पडताळणी होत आहे.
लाखो रुपयांचे मद्य येथे आढळून आले आहे. यानुसार गुन्हा दाखल करण्याचे काम सुरू आहे. येथे मद्य, तंबाखूजन्य पदार्थ आणि गांजा आढळून आला आहे. येथील पार्टीसाठी असलेले तरुण हे कोणत्या भागातून आले याचा तपास सुरू आहे. पार्टीत सहभागी झालेल्या मुला मुलींची कसून चौकशी पोलिसांकडून केली जात आहे.
