एव्हियन-लेस-बेन्स (फ्रान्स): फ्रान्समधील एव्हियन शहरात सुरू असलेल्या ५२ व्या जी-७ शिखर परिषदेच्या पार्श्वभूमीवर आज जागतिक राजकारणातील एक मोठी घडामोड पाहायला मिळाली. भारताचे पंतप्रधान नरेंद्र मोदी आणि अमेरिकेचे राष्ट्राध्यक्ष डोनाल्ड ट्रम्प यांची तब्बल १६ महिन्यांनंतर प्रत्यक्ष भेट झाली. दोन्ही नेत्यांनी अत्यंत उत्साहात एकमेकांशी हस्तांदोलन केले आणि त्यानंतर परिषदेच्या ‘आउटरीच सेशन’मध्ये ते एकमेकांच्या शेजारी बसल्याचे दिसून आले. फेब्रुवारी २०२५ मध्ये वॉशिंग्टन येथील व्हाईट हाऊस भेटीनंतर दोन्ही जागतिक नेते पहिल्यांदाच जाहीर व्यासपीठावर समोरासमोर आले आहेत.
जी-७ परिषदेच्या मुख्य सत्रापूर्वी जागतिक नेत्यांचे कौटुंबिक छायाचित्र काढण्यात आले. त्यानंतर पंतप्रधान मोदी आणि राष्ट्राध्यक्ष ट्रम्प यांच्यात सुमारे ५ मिनिटे अनौपचारिक चर्चा झाली. यावेळी दोन्ही नेत्यांच्या चेहऱ्यावर हास्य होते आणि अत्यंत सकारात्मक वातावरणात ही भेट पार पडली. या संक्षिप्त भेटीनंतर आउटरीच सत्राच्या दरम्यान दोन्ही नेते एकमेकांच्या बाजूला बसून चर्चा करताना दिसले.
दोनों नेत्यांमध्ये उद्या एक महत्त्वाची द्विपक्षीय बैठक होणार आहे. गेल्या काही महिन्यांत भारत आणि अमेरिकेच्या व्यापारी संबंधांमध्ये काही अंशी चढ-उतार पाहायला मिळाले होते. या पार्श्वभूमीवर होणाऱ्या या बैठकीत व्यापार, आयात शुल्क, आर्टिफिशियल इंटेलिजन्स, तंत्रज्ञान सहकार्य, गुंतवणूक भागीदारी, पुरवठा साखळी, जागतिक सुरक्षा आणि सागरी सुरक्षा आव्हाने यांसारख्या महत्त्वाच्या मुद्द्यांवर विस्तृत चर्चा होण्याची शक्यता आहे.
फ्रान्सला पोहोचल्यानंतर पंतप्रधान मोदींनी सोशल मीडिया प्लॅटफॉर्म ‘X’ वर जागतिक नेत्यांसोबतचे फोटो शेअर करत लिहिले की, जी-७ परिषदेचे कामकाज सुरू होण्यापूर्वी जागतिक नेत्यांशी झालेली चर्चा नेहमीप्रमाणेच फलदायी ठरली. जागतिक समृद्धी, शाश्वत विकास आणि मानवी कल्याणासाठी आम्ही एकत्र काम करत राहू.
गेल्या काही काळात पश्चिम आशियातील तणाव, आंतरराष्ट्रीय व्यापारी मार्ग आणि अमेरिकेने भारतीय उत्पादनांवर लावलेले शुल्क यांमुळे दोन्ही देशांच्या मुत्सद्दी वर्तुळात काही अंशी शीतता आली होती. मात्र, आजच्या या सकारात्मक भेटीमुळे आणि उद्या होणाऱ्या महत्त्वपूर्ण आर्थिक चर्चेमुळे भारत आणि अमेरिकेतील धोरणात्मक भागीदारीला पुन्हा एकदा मोठी गती मिळण्याची चिन्हे आहेत. फ्रान्सचे राष्ट्राध्यक्ष इमॅन्युएल मॅक्रॉन यांच्या विशेष निमंत्रणावरून पंतप्रधान मोदी या परिषदेला उपस्थित राहिले असून, भारताचा हा जी-७ मधील भागीदार देश म्हणून १३ वा सहभाग आहे.
