पुणे : प्रतिनिधी
पुण्याच्या राजगड तालुक्यातील पाबे घाट परिसरात शनिवारी मध्यरात्री भीषण अपघात घडला आहे. टेम्पो ट्रॅव्हलर बस खोल दरीत कोसळल्याने दोन जणांचा दुर्दैवी मृत्यू झाला आहे. तर अनेक प्रवासी गंभीर व किरकोळ जखमी झाले आहेत. या दुर्घटनेनंतर हवेली आपत्ती व्यवस्थापन पथक, पोलिस आणि स्थानिक ग्रामस्थांनी जीवाची पर्वा न करता अंधा-या रात्री बचावकार्य राबवून सर्व जखमींना सुरक्षित बाहेर काढत उपचारासाठी शासकीय रुग्णालयात दाखल केले.
पोलिसांकडून मिळालेल्या माहितीनुसार, चालक संदीप तुकाराम गायकवाड (वय ४७) हे अंधेरी (पूर्व), मुंबई येथून ट्रॅव्हल्समधून सुमारे २० प्रवाशांना राजगड किल्ल्यावर सहलीसाठी घेऊन येत होते. शनिवारी रात्री पाबे घाट उतरत असताना पावसामुळे रस्ता निसरडा झाल्याने वाहनावरील नियंत्रण सुटले आणि ट्रॅव्हल्स रस्त्यालगतच्या खोल दरीत कोसळून अनेक वेळा पलटी झाली. अपघातानंतर वाहनाचा चुराडा झाला. अनेक प्रवासी वाहनात अडकून पडल्याने घटनास्थळी एकच गोंधळ उडाला. घटनेची माहिती मिळताच वेल्हे पोलिस, हवेली आपत्ती व्यवस्थापन पथक तसेच स्थानिक नागरिकांनी तातडीने घटनास्थळी धाव घेतली.
अत्यंत कठीण परिस्थितीत, अंधार, मुसळधार पाऊस आणि खोल दरी यांचा सामना करत जखमींना सुरक्षित बाहेर काढून रुग्णवाहिकेद्वारे उपचारासाठी शासकीय रुग्णालयात रवाना केले.
या भीषण अपघातात विश्वास बाबुराव धातीय (वय २५, नेहरूनगर, विलेपार्ले, मुंबई) तसेच एका तरुणीचा दुर्दैवी मृत्यू झाला. इतर अनेक प्रवासी जखमी झाले असून त्यांच्यावर विविध खाजगी रुग्णालयांत उपचार सुरू आहेत.
