सना : अमेरिका आणि इराणमधील यांच्यातील तणावादरम्यान, येमेन आणि सौदी अरेबिया यांच्यात संघर्ष पेटल्याचे पाहायला मिळत आहे. सौदी अरेबियाने येमेनची राजधानी असलेल्या सना येथील विमानतळावर हल्ला केला. यानंतर येमेन देशातील इराण-समर्थित हूती बंडखोरांनी सौदी अरेबियावर मोठा प्रतिहल्ला चढवला. हूतीने सौदी अरेबियाच्या आभा आंतरराष्ट्रीय विमानतळावर क्षेपणास्त्रे आणि ड्रोन हल्ला केला. यामुळे संपूर्ण परिसरात युद्धाचा धोका अधिकच गडद झाला आहे.
सोमवारी येमेनच्या सना विमानतळावर जोरदार धमाके झाले. हूती बंडखोरांनी असा दावा केला आहे की, सौदी अरेबियाने येथे हवाई हल्ला केला. येमेनच्या अधिकृत सरकारचे संरक्षण मंत्री जनरल ताहिर अल-अकीली यांनी सांगितले की, इराणचे सर्वोच्च नेते अयातुल्ला अली खामेनी यांच्या अंत्यसंस्कारावरून परतणा-या हूती शिष्टमंडळाचे विमान सना विमानतळावर उतरणार होते. हे विमान रोखण्यासाठीच धावपट्टीवर हल्ला करण्यात आला. मात्र, ते विमान आपला रस्ता बदलून होदेइदाह विमानतळावर सुरक्षित उतरले. हूती बंडखोरांचे प्रवक्ते ब्रिगेडियर जनरल याह्या सारी यांनी स्पष्ट केले की, सना विमानतळावरील हल्ल्याचा बदला घेण्यासाठीच त्यांनी सौदीच्या आभा विमानतळाला लक्ष्य केले आणि हा हल्ला यशस्वी झाला.
हूतींचा जगातील विमान कंपन्यांना इशारा
सना विमानतळावरील नाकेबंदी जोपर्यंत हटवली जात नाही, तोपर्यंत कोणत्याही विमानाने सौदी अरेबियाच्या हवाई हद्दीतून प्रवास करू नये. आमच्या या इशा-याला गांभीर्याने घ्यावे असा इशारा हूतींनी जगातील सर्व विमान कंपन्यांना दिला. सौदी अरेबियाने सना विमानतळावरील हल्ल्याबाबत अद्याप अधिकृतपणे कोणतीही कबुली किंवा प्रतिक्रिया दिलेली नाही. मात्र, या नव्या वादामुळे संपूर्ण आखाती देशांमध्ये युद्धाची ठिणगी पडण्याची भीती वर्तवली जात आहे.
