दोघे जखमी, क्षुल्लक कारणावरून हाणामारीचा थरार
लातूर : प्रतिनिधी
येथील कव्हा नाका भागांतील दुर्गादेवी परिसरातील बारमध्ये क्षुल्लक कारणावरून गुरुवारी मध्यरात्री दोन गटांत तुफान हाणामारी झाली. या हाणामारीदरम्यान, एका तरुणाच्या गळ््याला कोयता लागल्याने उपचारादरम्यान मृत्यू झाला. सोपान सुग्रीव बोयणे (२१, माताजीनगर, लातूर) असे मृत तरुणाचे नाव आहे. लातूरमध्ये मध्यरात्री हाणामारीचा थरार झाल्याने कव्हा नाका परिसरात तणावाची स्थिती आहे. या प्रकरणी दोघांना ताब्यात घेण्यात आले असून, इतर आरोपींचा शोध सुरू आहे.
दुर्गादेवी परिसरातील एका बारमध्ये गुरुवारी रात्री दारू पित असताना पाय वर का केला, अशा क्षुल्लक कारणावरून मित्रांमध्ये बाचाबाची झाली. या बाचाबाचीचे रुपांतर दोन गटांच्या हाणामारीत झाले. या हाणामारीदरम्यान एकाच्या गळयाला कोयता लागल्याने तरुणाला तातडीने शासकीय रुग्णालयात दाखल केले. परंतु उपचारादरम्यान मृत्यू झाला तर इतर दोघेजण जखमी झाले आहेत. या प्रकरणी एकमेकांच्या विरोधात विवेकानंद पोलिस ठाण्यात गुन्हा नोंद करण्यात आला.
कव्हा तलावाच्या जवळील एका बारमध्ये गुरुवारी रात्री ११.३० वाजता ४ मित्र दारू पित बसले होते. यातील एका मित्राने पाय का वर केला, म्हणून बारमध्ये बाचाबाची झाली. तसेच बारच्या बाहेरही बाचाबाची होऊन दोन्ही मित्रांनी आपल्या जवळच्या मित्रांना बोलावले. त्यामुळे वाद अधिकच वाढला. यात माताजीनगर येथील सोपान सुग्रीव बोयणे (२१) यांच्या गळयावर कोयत्याने वार केल्याने त्यांचा मृत्यू झाला. या प्रकरणी बाबा शेख यांच्या फिर्यादीवरून व्यंकटेश डोंगरे, निरंजन काटेकर व इतर तिघा जणांवर विवेकानंद पोलिस ठाण्यात खुनाचा गुन्हा दाखल करण्यात आला. या घटनेचा अधिक तपास पोलिस निरीक्षक अरविंद पवार हे करीत आहेत.
तीन पथकांकडून
आरोपींचा शोध सुरू
या घटने प्रकरणी सुमित शेंडगे यांच्या फिर्यादीवरून पंकज पारीख, बाबा शेख व इतर फरार तिघांवर कलम ३०७ नुसार विवेकानंद पोलिस ठाण्यात गुन्हा दाखल करण्यात आला आहे. या घटनेचा तपास पीएसआय उजगरे हे करीत आहेत. या घटनेच्या तपासासाठी ३ पथके तयार केली असून आरोपींचा शोधही घेतला जात असल्याचे पोलिस निरीक्षक पवार यांनी सांगितले.
