अमृतसर : दिल्लीतील जंतर-मंतरवर मोठ्या दहशतवादी हल्ल्याचा कट उघडकीस आणत, पंजाब पोलिसांनी पाकिस्तानची गुप्तचर संस्था आयएसआयशी संबंधित दोन सीमापार दहशतवादी मॉड्यूल्सचा पर्दाफाश केला आहे. या कारवाईत चार अल्पवयीन मुलांसह एकूण ९ आरोपींना अटक करण्यात आली आहे.
अमृतसर पोलिस आयुक्तालयाने केलेल्या या कारवाईत आरोपींच्या ताब्यातून तीन बेकायदेशीर पिस्तूल, जिवंत काडतुसे, चार पेट्रोल बॉम्ब, सीसीटीव्ही कॅमेरे आणि एक मोटारसायकल जप्त करण्यात आली आहे. पोलिस आयुक्त गुरप्रीत सिंग भुल्लर यांनी सांगितले की, ज्यावेळी जंतर-मंतरवर विद्यार्थ्यांचे आंदोलन सुरू होते, त्याचवेळी आरोपी ट्रेनने दिल्लीत पोहोचले होते. पाकिस्तानस्थित हँडलरच्या निर्देशानुसार त्यांना पेट्रोल बॉम्ब पुरवण्यात आले होते. मात्र, दिल्ली पोलिसांच्या उपस्थितीमुळे ते कट यशस्वी करू शकले नाहीत. पोलिसांनुसार, आरोपींना पेटीएमद्वारे आर्थिक मदतही मिळत होती. या निधीच्या स्त्रोताची आणि व्यवहाराची चौकशी केली जात आहे. दुस-या मॉड्यूलचे सदस्य परदेशात बसलेल्या हँडलर्सकडून ऑनलाइन सूचना घेत होते. त्यांच्या ताब्यातून चार पेट्रोल बॉम्ब, एक पिस्तूल, लाइटर आणि एक मोटारसायकल जप्त करण्यात आली. प्राथमिक तपासात पोलिस ठाण्यांवर आणि सुरक्षा आस्थापनांवर हल्ल्याच्या कटाचाही खुलासा झाला.
आयएसआय हँडलर्सकडून मिळत होते निर्देश
पोलिसांच्या प्राथमिक तपासात समोर आले की, आरोपींचा संपर्क पाकिस्तानच्या गुप्तचर संस्था आयएसआयशी संबंधित हँडलर्सशी होता. त्यांना पोलिसांवर हल्ला करण्याचे आणि जंतर-मंतरवर दहशत पसरवण्याचे निर्देश दिले जात होते.
जंतर-मंतरमध्ये स्फोट घडवण्याचा कट होता
तपासात असे समोर आले की, नेटवर्कच्या तारा दिल्लीतील जंतर-मंतरपर्यंत जोडलेल्या होत्या. हँडलर्सनी आरोपींना तिथे सामग्री उपलब्ध करून दिली होती आणि स्फोटाची योजना आखली होती, परंतु दिल्ली पोलीस आणि आरएएफच्या मोठ्या पथकाच्या उपस्थितीमुळे हा कट यशस्वी होऊ शकला नाही.
अमृतसर रेल्वे ट्रॅकची रेकी
टोळीचा पहिला मॉड्यूल अमृतसर रेल्वे ट्रॅकजवळ गुप्त सीसीटीव्ही कॅमेरे लावून लाईव्ह फुटेज पाकिस्तानात बसलेल्या आयएसआय हँडलर्सना पाठवत होता. याचा उद्देश संवेदनशील ठिकाणांची रेकी करून सुरक्षा संबंधित माहिती गोळा करणे हा होता.
शस्त्रास्त्रांसह आरोपी अटक
पोलिसांनी सर्वात आधी वंश कुमार(१९) रा. पट्टी (जिल्हा तरनतारन) नावाच्या तरुणाला अटक केली, ज्याच्याकडून ०.३२ बोअरचे गावठी पिस्तूल आणि काडतुसे जप्त करण्यात आली. त्याच्या माहितीवरून अनमोल सिंग उर्फ साहिल (२०) रा. पट्टी (जिल्हा तरनतारन), हरमन सिंग उर्फ हम्मू (२४), सुखदेव सिंग (३०) रा. गाव झंजोटी (जिल्हा अमृतसर) आणि एका अल्पवयीन मुलाला अटक करण्यात आली. तपासात हे देखील समोर आले की काही आरोपी यापूर्वीही बेकायदेशीर शस्त्रास्त्रांच्या प्रकरणात अटक झाले होते.
