नवी दिल्ली : वृत्तसंस्था
फुकेटवरून दिल्लीला येणा-या एअर इंडियाच्या विमानाची हवेत अचानक ३०० फूट उंची घसरून २५ जण जखमी झाल्याच्या दुर्घटनेत एक धक्कादायक माहिती समोर आली असून रिपोर्टनुसार, या विमानाच्या मुख्य वैमानिकाची (पायलट-इन-कमांड) दुसरी (कन्फर्मेटरी) डोप चाचणी पॉझिटिव्ह आली असून, त्याने ‘गांजा’ सेवन केल्याचे प्रयोगशाळेच्या अहवालात निष्पन्न झाले आहे.
४ ऑगस्ट रोजी झालेल्या या घटनेनंतर दोन्ही वैमानिकांची ‘सायकोअॅक्टिव्ह सबस्टन्स’ चाचणी करण्यात आली होती. यामध्ये को-पायलटची चाचणी निगेटिव्ह आली, तर मुख्य पायलटचा प्राथमिक अहवाल संशयास्पद आढळल्याने नमुने विशेष प्रयोगशाळेत पाठवण्यात आले होते. सध्या दोन्ही वैमानिकांना उड्डाण कर्तव्यावरून हटवण्यात आले आहे. एअर इंडियाच्या ‘ए१२३७९’ (एअरबस ए३२०) या विमानात १३७ प्रवासी आणि ८ कर्मचारी उपस्थित होते. प्रवासादरम्यान अचानक विमानाची उंची ३०० फुटांनी घटल्याने २० प्रवासी आणि ४ केबिन क्रू सदस्य जखमी झाले. या घडामोडीनंतर वैमानिकांनी विमानावर नियंत्रण मिळवत दिल्लीत सुरक्षित लँडिंग केले.
