नवी दिल्ली : दिल्ली पोलिसांच्या स्पेशल सेलने पाकिस्तानच्या गुप्तचर संस्था आयएसआयशी संबंधित हेरगिरी नेटवर्कचा पर्दाफाश केला आहे. पोलिसांनी हेरगिरीच्या आरोपाखाली दिल्लीतील साहिल (२५) आणि त्याची पत्नी समीरा (२१) या जोडप्याला अटक केली आहे.
पोलिसांनुसार, दोघे २०२४ पासून पाकिस्तानात बसलेल्या गुप्तचर अधिका-यांच्या संपर्कात होते. ते भारताशी संबंधित संवेदनशील माहिती गोळा करणे, ८ भारतीय सिम कार्ड पाकिस्तानात पाठवणे आणि इतर लोकांना हेरगिरीसाठी तयार करण्यात मदत करत होते. अधिका-यांनी सांगितले की, तपासात या नेटवर्कचे धागेदोरे दिल्लीपासून कराची आणि इस्लामाबादपर्यंत जोडलेले आढळले आहेत. पाकिस्तानात बसलेले हँडलर दोघांना पैसेही पाठवत होते.
पोलिसांनुसार, साहिल आणि समीराने २०२४ ते २०२५ दरम्यान ५ भारतीय सिम कार्ड मिळवले. हे सिम कार्ड दुबईमार्गे पाकिस्तानात पाठवण्यात आले. हँडलरने यासाठी दाम्पत्याला ३० हजार रुपये दिले होते. पोलिसांनी सांगितले की, या नंबरवरून पाकिस्तानात व्हॉट्सअॅप अकाउंट अॅक्टिव्हेट करण्यात आले. पाकिस्तानी गुप्तचर अधिका-यांनी या अकाउंट्सद्वारे भारतातील लोकांशी संपर्क साधला आणि संवेदनशील माहिती गोळा करण्याचा प्रयत्न केला.
यापैकी काही खात्यांद्वारे भारतीय व्हॉट्सअॅप ग्रुपमध्येही प्रवेश करण्याचा प्रयत्न करण्यात आला. पोलिसांनुसार, पाकिस्तानात बसलेले हँडलर सोशल मीडिया आणि एन्क्रिप्टेड कम्युनिकेशन प्लॅटफॉर्मद्वारे भारतातील लोकांशी संपर्क साधत होते.
सैन्य क्षेत्रांची माहिती गोळा केल्याचा आरोप
पोलिसांचा आरोप आहे की साहिलला भारताच्या वेगवेगळ्या भागांतील छावणी क्षेत्रांची रेकी करण्याचे काम देण्यात आले होते. त्याला हेरगिरी आणि फील्ड ऑपरेशनसाठी लोकांना भरती करण्याची जबाबदारीही देण्यात आली होती.
