भाजप कार्यकर्त्यावर गुन्हा, ४ बीएलओ निलंबित
नवी मुंबई : प्रतिनिधी
जिल्ह्यातील खारघरमध्ये एसआयआर फॉर्मवरून राजकीय राडा झाल्याची घटना समोर आली आहे. एका झेरॉक्स दुकानात हजारो एसआयआर फॉर्म झेरॉक्स केले जात असल्याची माहिती मिळाल्यानंतर ठाकरे गटाच्या पदाधिका-यांनी दुकानात धाव घेतली. यावेळी हे फॉर्म झेरॉक्ससाठी घेऊन आलेला व्यक्ती भाजपचा युवा पदाधिकारी असल्याचे समोर आले. या प्रकरणी ४ बीएलओंना निलंबित करण्यात आले असून पोलिसांनी गुन्हा दाखल केला आहे.
दरम्यान, हे प्रकरण अतिशय गंभीर असून, केवळ बीएलओंना निलंबित करून भागणार नाही तर त्यांना आदेश देणा-या अधिका-यांवरही कारवाई झाली पाहिजे, अशी मागणी आमदार रोहित पवार यांनी केली आहे. खारघरमधील एका झेरॉक्स दुकानात हजारो एसआयआर फॉर्म झेरॉक्स केले जात असल्याची माहिती मिळाल्यानंतर ठाकरे गटाच्या पदाधिका-यांनी दुकानात धाव घेतली. त्यावेळी ठाकरे गट आणि भाजप पदाधिका-यांमध्ये झटापट झाली. खारघर पोलिस या प्रकरणाची दखल घेत नसल्याने पोलिस ठाण्यात ठाकरे गटाने ठिय्या आंदोलन केले.
या प्रकरणी अखेर भाजप कार्यकर्ता सुरज पाटील याच्यावर खारघर पोलिस ठाण्यात गुन्हा दाखल करण्यात आला. पाच बीएलओ प्रतिनिधींना रायगड जिल्हाधिकारी यांनी निलंबित केले आहे. भाजप कार्यकर्ता सुरज पाटील याच्याकडून ३५ हजार एसआयआर अर्ज ताब्यात घेवून सील करण्यात आले आहेत.
निवडणूक आयोगाने
उत्तर द्यावे : रोहित पवार
या प्रकरणात ४ बीएलओंना निलंबित केल्याचे समजते. पण, केवळ बीएलओंना निलंबित करून भागणार नाही तर त्यांना आदेश देणारे अधिकार कोण आहेत? तेही निलंबित झाले पाहिजेत आणि भाजप कार्यकर्त्यावरही कारवाई झाली पाहिजे, अशी मागणी शरद पवारांच्या राष्ट्रवादीचे आमदार रोहित पवार यांनी केली. जागरुक नागरिकांमुळे हा प्रकार उघडकीस आला म्हणून लाजेखातर ही कारवाई केली असेल, पण याचे उत्तर निवडणूक आयोगाने द्यावे, अशी मागणी त्यांनी केली.
