पुणे : प्रतिनिधी
मंगलमय,उत्साहपूर्ण आणि भक्तिमय वातावरणात व ढोल ताशाच्या निनादात श्री गणेशाचे आगमन पुण्यनगरीत झाले. अनेक गणेश मंडळांनी मिरवणूकीचे आयोजन केले होते. सकाळी घरोघरी श्री गणेशाची प्रतिष्ठापना करण्यात आली नंतर सार्वजनिक गणेश मंडळाच्या श्री गणेशाची प्रतिष्ठापना करण्यात आली.गेल्या दोन चार दिवसांपासून बाजारपेठ विविध वस्तूंच्या खरेदीसाठी फुलली आहे.
फळे आणि फुलांच्या दरात वाढ तर साखर आणि गुळाच्या दरात काही प्रमाणात घसरण झाली असल्याचे दिसून आले.त्याचप्रमाणे सजावटीचे साहित्याच्या खरेदीसाठी उत्साह द्विगुणित झाला असल्याचे पाहावयास मिळाले.शहर आणि परिसरात तीन हजार पेक्षा अधिक मंडळांची संख्या आहे. पुण्यनगरीतील मानाच्या गणेश मंडळांनी सकाळी वाजत गाजत श्री गणेशाची प्रतिष्ठापना केली. ‘गणपती बाप्पा मोरया… मंगलमूर्ती मोरया’च्या जयघोषात श्रीमंत दगडूशेठ हलवाई गणपती मंदिरापासून फुलांनी सजविलेल्या मयूर रथातून निघालेल्या मिरवणुकीने वाजत गाजत वृंदावन मध्ये साकारलेल्या प्रतिकृतीमध्ये श्री गणपती बाप्पा विराजमान झाले.
गणपती बाप्पा मोरया… चा जयघोष
श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळ च्यावतीने ट्रस्टच्या १३४ व्या वर्षानिमित्त आयोजित उत्सवाचा प्रारंभ हजारो भक्तांच्या साक्षीने झाला. गणेश चतुर्थीला सकाळी ११ वाजून ११ मिनिटांनी उत्तरप्रदेश वृंदावन येथील श्री राधावल्लभ मंदिराचे १८ वे तिलकायत अधिकारी श्रीहित मोहितमराल गोस्वामीजी महाराज यांच्या हस्ते ‘श्रीं’ची प्राणप्रतिष्ठापना झाली. सकाळी मुख्य मंदिरापासून फुलांनी सजविलेल्या मयूर रथातून ‘श्रीं ’ची आगमन मिरवणूक काढण्यात आली. गणपती बाप्पा मोरया… चा जयघोष करत यावेळी गंधाक्ष ढोल ताशा पथक, मयूर बँड, प्रभात बँड आणि दरबार बँड मिरवणुकीत सहभागी झाले होते.
