लातूर : प्रतिनिधी
दिवाळीच्या सणाचा आनंद समाजातील प्रत्येक घटकापर्यंत पोहोचावा, या उद्देशाने वसुंधरा प्रतिष्ठान संचलित वसुंधरा वृक्षरूपी गणेश मंडळाच्या वतीने खुशी ग्राम येथे सलग अकराव्या वर्षी ‘माणुसकीची दिवाळी’ हा उपक्रम राबविण्यात आला. लक्ष्मीपूजनाच्या दिवशी सकाळी आयोजित या उपक्रमात खुशी ग्राममधील अनाथ व निरागस बालकांसोबत दिवाळी साजरी करण्यात आली. बालकांना नवीन कपडे, मिठाई, फटाके आणि दिवाळी सेलिब्रेशन पॅक भेट देऊन मंडळाच्या सदस्यांनी त्यांच्या आनंदात सहभाग नोंदविला.
सण-उत्सव हे सामाजिक एकोपा आणि माणुसकीची भावना वृद्धिंगत करण्याचे माध्यम असतात. मात्र, अनेकदा समाजातील काही घटकांपर्यंत सणांचा आनंद पोहोचत नाही. ही बाब लक्षात घेऊन वसुंधरा वृक्षरूपी गणेश मंडळाने ‘माणुसकीची दिवाळी’ हा उपक्रम सुरू केला. खुशी ग्राम ही संस्था अनाथ व निरागस बालकांच्या संगोपनाचे कार्य करते. याच संस्थेची निवड करून मंडळाच्या वतीने दरवर्षी दिवाळीच्या निमित्ताने बालकांसोबत हा उत्सव साजरा केला जातो. यंदा या उपक्रमाचे अकरावे वर्ष होते. लक्ष्मीपूजनाच्या दिवशी सकाळी मंडळाचे पदाधिकारी व सदस्य खुशी ग्राम येथे एकत्र आले. बालकांना दिवाळीनिमित्त नवीन कपडे, मिठाई, फटाके आणि दिवाळी सेलिब्रेशन पॅक देण्यात आले. भेटवस्तूंच्या वाटपानंतर बालकांसोबत दिवाळीचा उत्सव साजरा करण्यात आला. या उपक्रमामुळे बालकांनाही दिवाळीच्या सणात सहभागी होण्याची संधी मिळाली. सामाजिक उपक्रमांमध्ये केवळ आर्थिक मदत किंवा वस्तूंचे वाटप न करता प्रत्यक्ष सहवासातून आनंद वाटून घेण्याचा मंडळाचा प्रयत्न या उपक्रमातून दिसून आला.
वसुंधरा प्रतिष्ठानच्या माध्यमातून पर्यावरण संवर्धनासोबतच सामाजिक उपक्रमांनाही प्राधान्य दिले जाते. वसुंधरा वृक्षरूपी गणेश मंडळाच्या विविध उपक्रमांमध्ये सामाजिक जाणीव, पर्यावरण संरक्षण आणि लोकसहभाग यांचा समन्वय साधला जातो. ‘माणुसकीची दिवाळी’ हा उपक्रम त्याच सामाजिक बांधिलकीचा भाग असून, गेल्या अकरा वर्षांपासून त्यात सातत्य राखण्यात आले आहे. या उपक्रमास सिनेसृष्टीतील लेखक व निर्माते श्रीनिवास कुलकर्णी, व्यापारी धीरज शर्मा, निशा शर्मा, वसुंधरा वृक्षरूपी गणेश मंडळाचे संस्थापक अध्यक्ष प्रा. योगेश शर्मा, उपाध्यक्ष रामेश्वर बावळे, मुख्य समन्वयक राहुल माशाळकर, कार्याध्यक्ष अमोल स्वामी, सदस्य दत्ता जाधव, राहुल औरादे, आदित्य कुलकर्णी तसेच खुशी ग्रामचे संचालक मधुकरराव सोनवणे आणि
वर्षाताई सोनवणे यांची उपस्थिती होती.
