लातूर : प्रतिनिधी
जिल्हा परिषदेतील लिपिकवर्गीय गट क संवर्गातील लिपिकवर्गीय कर्मचा-यांच्या पदोन्नतीचे स्तर कमी करण्यासाठी शासनाच्या ग्रामविकास विभागाने कनिष्ठ प्रशासन अधिकारी (एस १३) व सहाय्यक प्रशासन अधिकारी (एस १४) हे दोन संवर्ग एकत्रित करून सहाय्यक प्रशासन अधिकारी (एस १४) हा आता एकच संवर्ग केला आहे. त्यामुळे लातूर जिल्हा परिषदेत कार्यरत असलेल्या कनिष्ठ प्रशासन अधिकारी (एस १३) यांची शासनाने दिवाळी गोड केली आहे.
सामान्य प्रशासन विभागाच्या दि. २३ मे २०२२ रोजीच्या शासन परिपत्रकान्वये, लिपिकवर्गीय कर्मचा-यांच्या मागण्यांसंदर्भात अभ्यास करण्यासाठी गठीत केलेल्या समितीने गट-क मधील पदोन्नतीचे स्तर कमी करणेबाबत केलेल्या शिफारशीनुसार, गट-क मधील संवर्गाचा आढावा घेऊन संवर्ग कमी करण्याचे, पदोन्नतीचे स्तर कमी करण्याचे सूचित केले. तज्ञ समितीने ग्राम विकास विभागास शिफारशी सादर केल्या. त्यानुसार जिल्हा परिषद लिपिकवर्गीय गट-क संवर्गातील पदोन्नतीचे स्तर कमी करण्यासाठी ‘कनिष्ठ प्रशासन अधिकारी (एस १३)’ व ‘सहाय्यक प्रशासन अधिकारी (एस १४)’ हे दोन संवर्ग एकत्रित करुन ‘सहाय्यक प्रशासन अधिकारी (एस १४)’ हा एकच संवर्ग तयार करण्याच्या हालचाली सुरू होत्या.
जिल्हा परिषदेतील लिपिकवर्गीय कर्मचा-यांची पदोन्नती साखळी सुधारित होत असल्याने शासन आदेश जारी झाल्यापासून सुधारित पदोन्नती साखळी नुसार आश्वासित प्रगती योजनेचे लाभ मिळणार आहेत. या दोन्ही पदांचे एकत्रीकरण झाल्याने सध्या असलेली सेवा ज्येष्ठता विचारात घेऊन एकत्रित पदासाठी सेवा ज्येष्ठता यादी नियुक्त प्राधिकारी यांनी त्यांच्या स्तरावर तयार करावी, अशा सुचना आहेत. या दोन्ही संवर्गातील एकत्रीकरण झालेल्या सहाय्यक प्रशासन अधिकारी पदावर कार्यरत असलेल्या अधिका-यांना मुख्यकार्यकारी अधिकारी यांच्याकडून जबाबदा-याचे वाटप होणार आहे.
