परभणी : विश्वास गुंडावार
जिल्ह्याच्या वैद्यकीय क्षेत्राच्या शिरपेचात मानाचा तुरा रोवणारी आणि परभणीकरांसाठी अत्यंत अभिमानास्पद अशी बातमी समोर आली आहे. एका ५० वर्षीय रुग्णावर अत्यंत क्लिष्ट अशी किडनीच्या कर्करोगावरची शस्त्रक्रिया परभणीत पहिल्यांदाच लॅप्रोस्कोपी म्हणजेच संपूर्णपणे दुर्बिणीद्वारे यशस्वीरित्या पार पडली आहे. परभणी आय.सी.यू. व ट्रामा केअर हॉस्पिटल येथे झालेल्या या ऐतिहासिक शस्त्रक्रियेमुळे आता जिल्ह्यातील रुग्णांना अशा गंभीर आजारांच्या उपचारासाठी मुंबई-पुण्यासारख्या मोठ्या शहरांकडे धाव घेण्याची गरज उरलेली नाही.
एका ५० वर्षीय रुग्णाला तीव्र पोटदुखीचा त्रास होत असल्याने त्यांना परभणी आय.सी.यू. व ट्रामा केअर हॉस्पिटलच्या ओ.पी.डी. मध्ये आणण्यात आले होते. डॉक्टरांनी तातडीने रोगाचे अचूक निदान करण्यासाठी सोनोग्राफी व इतर आवश्यक तपासण्या केल्या. परंतु, तपासणीचा अहवाल धक्कादायक आला; रुग्णाच्या एका बाजूच्या किडनीला कर्करोगाची मोठी गाठ असल्याचे निष्पन्न झाले. रुग्णाचे वय पाहता पारंपरिक पद्धतीने मोठी चीर देऊन ऑपरेशन करणे अत्यंत धोक्याचे आणि क्लिष्ट होते. अशा परिस्थितीत, रुग्णाचा जीव वाचवण्यासाठी आणि त्याला कमीत कमी त्रास व्हावा म्हणून वैद्यकीय टीमने एक मोठा आणि धाडसी निर्णय घेतला.
प्रसिद्ध सर्जन डॉ. भगवान कांबळे यांनी आपल्या कौशल्याचा वापर करत हे ऑपरेशन पारंपरिक पद्धतीने न करता, अत्याधुनिक लॅप्रोस्कोपी (दुर्बिणीद्वारे) पद्धतीने करण्याचे ठरवले. ज्यामध्ये कर्करोग झालेली संपूर्ण किडनी दुर्बिणीच्या साहाय्याने शरीराबाहेर काढली जाते. या अत्याधुनिक पद्धतीमुळे रुग्णाला अत्यंत कमी टाके पडले, शस्त्रक्रियेदरम्यान होणारा रक्तस्त्राव नगण्य राहिला आणि वाढत्या वयातही रुग्ण अत्यंत वेगाने व लवकर बरा होण्यास मदत झाली.
तज्ज्ञ डॉक्टरांची टीम वर्क आणि अत्याधुनिक यंत्रणा
ही ऐतिहासिक शस्त्रक्रिया यशस्वी करण्यासाठी परभणीतील तज्ज्ञ डॉक्टरांच्या चमूने अहोरात्र कष्ट घेतले. अत्याधुनिक ऑपरेशन थिएटर सज्ज करण्यापासून ते आय.सी.यू. मधील अत्यंत महत्त्वाच्या पूर्वतयारीची जबाबदारी डॉ. सागर चौधरी, डॉ. गोविंद कदम, भूलतज्ज्ञ डॉ. रवींद्र पाचलेगावकर आणि फिजिशियन डॉ. विकास चोपडे व संपूर्ण वैद्यकीय टीमने चोख बजावली. परभणीत पहिल्यांदाच घडलेल्या या यशस्वी आणि ऐतिहासिक शस्त्रक्रियेमुळे संपूर्ण जिल्ह्यातून डॉ. भगवान कांबळे, डॉ. सूर्यकांत देशमुख आणि त्यांच्या सर्व सहकायांवर कौतुकाचा वर्षाव होत आहे. ही यशोगाथा परभणीच्या वैद्यकीय क्षेत्राला एका नव्या उंचीवर घेऊन जाणारी ठरली आहे.
रुग्ण आणि त्यांच्या नातेवाईकांनी ऐन कठीण प्रसंगात आमच्यावर जो दृढ विश्वास दाखवला, तो खरोखर मोलाचा होता. लॅप्रोस्कोपी शस्त्रक्रियेत अत्यंत पारंगत असलेले डॉ. भगवान कांबळे यांची अफाट कुशलता, संपूर्ण वैद्यकीय टीमचे अथक परिश्रम आणि आपल्या हॉस्पिटलमधील अत्याधुनिक उपचार पद्धती व सुसज्ज आय.सी.यू. यामुळेच आपण परभणीच्या इतिहासात हा मैलाचा दगड पार करू शकलो. रुग्णाला वेळेत योग्य उपचार मिळून दिलासा मिळाला, याचे आम्हास आत्मिक समाधान आहे असे परभणी आय.सी.यू. अँड ट्रामा केअरचे संचालक डॉ. सूर्यकांत देशमुख यांनी म्हटले आहे.
