भिवंडी : प्रतिनिधी
देशभरात नीट परीक्षेच्या पेपरफुटीचे प्रकरण गाजत असतानाच आता महाराष्ट्रातील ६ लाखांपेक्षा जास्त भावी शिक्षकांच्या भवितव्याशी संबंधित असलेल्या शिक्षक पात्रता परीक्षा (टीईटी) पेपरफुटीबाबत एक अत्यंत धक्कादायक माहिती समोर आली. उत्तर प्रदेशातील आग्रा येथील एका छापखान्यातून अवघ्या ८ हजार रुपयांमध्ये बाहेर काढलेला प्रश्नपत्रिकेचा संच दलालांच्या जाळ््यांतून फिरत-फिरत जेव्हा भिवंडीत पोहोचला, तेव्हा त्याची किंमत तब्बल ८० हजार रुपयांवर गेल्याचा खळबळजनक खुलासा पोलिस तपासात झाला.
शिक्षक बनण्याचे स्वप्न पाहणा-या लाखो उमेदवारांच्या आयुष्याशी खेळणा-या या टीईटी पेपरफुटी रॅकेटचा पर्दाफाश भिवंडी पोलिसांनी केला. तपासादरम्यान समोर आलेल्या माहितीनुसार संबंधित छापखान्यातील कर्मचारी नरेशकुमार याने हा अत्यंत गोपनीय पेपर मुख्य फरार आरोपी बिजेंद्र गुप्ताचा साथीदार सोनू याला अवघ्या ८ हजार रुपयांत विकला होता. यानंतर बिजेंद्र गुप्ताने आपल्या विविध राज्यांमधील एजंट्स आणि दलालांच्या साखळीचा वापर करून हा पेपर सुरुवातीला ८० हजार रुपयांना विकला.
पुढे जसा जसा हा पेपर प्रत्येक टप्प्यावरील दलालांकडे गेला, तसा तसा त्यांनी स्वत:चा मोठा नफा त्यात जोडला. भिवंडीतील ग्राहकांपर्यंत हा पेपर पोहोचेपर्यंत त्याची किंमत तब्बल १.५ कोटी रुपयांवर गेली होती. गोपनीयता राखण्यासाठी परीक्षा परिषदेने राज्याबाहेरील आग्रा येथील अत्यंत गोपनीय महीम पत्रन प्रायव्हेट लिमिटेड या छापखान्यात छपाईची जबाबदारी दिली होती. येथे सुरक्षा असतानाही टीईटीचा पेपर फोडला.
पोलिस सूत्रांनी दिलेल्या माहितीनुसार फरार आरोपी बिजेंद्र गुप्ता हा अत्यंत शातिर आणि नियोजनबद्ध पद्धतीने काम करत असे. देशभरातील विविध राज्यांच्या गोपनीय प्रश्नपत्रिका ज्या छापखान्यांत छापल्या जातात, अशा ठिकाणांची तो आधी माहिती काढायचा. त्यानंतर तेथील कर्मचा-यांना पैशांचे मोठे आमिष दाखवून आपल्या जाळ््यात ओढायचा. कोणत्याही राज्याची प्रश्नपत्रिका छापायला आली की, ती कर्मचा-यांच्या मदतीने चोरून संबंधित राज्यातील एजंटांमार्फत लाखो रुपयांना विकली जात असल्याचे तपासात उघड झाले. टीईटीच्या पेपर-१ आणि पेपर-२ चे प्रत्येकी दोन संच छापले जात असल्यामुळे परीक्षेच्या दिवशी कोणताही एक संच निवडण्याचा नियम होता. याचाच गैरफायदा घेत नरेशकुमारने सलग तीन दिवस सुरक्षेला चकवा देऊन चारही संच छापखान्याबाहेर काढले आणि ते मुख्य आरोपीच्या साथीदाराला आणून दिले.
बिजेंद्र गुप्ता पेपरफुटी रॅकेटचा मास्टरमाईंड
पोलिसांनी दिलेल्या माहितीनुसार अटक करण्यात आलेल्या आरोपींकडून प्रश्नपत्रिकेची मूळ प्रत हस्तगत करण्यात आली. या संपूर्ण रॅकेटचा मुख्य मास्टरमाईंड बिहारचा रहिवासी बिजेंद्र गुप्ता हा असून तो सध्या फरार आहे.
सुरक्षा यंत्रणेला ठेंगा दाखवत चोरला पेपर
२८ जून रोजी होणा-या महाराष्ट्र टीईटी परीक्षेची प्रश्नपत्रिका उत्तर प्रदेशातील आग्रा येथील महीम पत्रम प्रायव्हेट लिमिटेड या छापखान्यात छपाईसाठी पाठवण्यात आली होती. तिथे सुरक्षेची चोख व्यवस्था असतानाही तिथला कर्मचारी नरेशकुमार मौहर ऊर्फ निकी याने सुरक्षा यंत्रणेतील पळवाटा शोधून प्रश्नपत्रिका बाहेर काढली. छापखान्यातून बाहेर पडताना केवळ कपड्यांची वरवर झडती घेतली जात असल्याचे नरेशकुमारने हेरले होते.
बुटाच्या इनसोलमध्ये लपवून आणले पेपर
१५ ते १७ जूनदरम्यान छपाई सुरू असताना प्रेसमधील कर्मचारी नरेशकुमार पुरनचंद माहौर उर्फ निक्की याने प्रश्नपत्रिकेची पाने घडी करून ती बुटाच्या इनसोलखाली लपवली. सुरक्षा रक्षकांनी शरीराची तपासणी केली, पण बुटांची नाही. याचाच फायदा घेत त्याने सलग तीन दिवस पेपर-१ आणि पेपर-२ चे चारही संच छापखान्याबाहेर काढले.
