लंडन : ब्रिटनमध्ये सोमवारी अँडी बर्नहॅम यांनी नवीन पंतप्रधान म्हणून पदभार स्वीकारला. गेल्या १० वर्षांत ते ब्रिटनचे सातवे पंतप्रधान बनले आहेत. त्यांनी देशाच्या राजकीय आणि प्रशासकीय व्यवस्थेत मोठ्या बदलांचे आश्वासन दिले आहे आणि म्हटले आहे की, त्यांचे सरकार लोकांच्या दैनंदिन समस्यांवर, जसे की महागाई आणि खराब सार्वजनिक सेवांवर, सर्वाधिक लक्ष केंद्रित करेल.
माजी पंतप्रधान कीर स्टार्मर यांनी १० डाउनिंग स्ट्रीटबाहेर निरोप समारंभाचे भाषण दिल्यानंतर किंग चार्ल्स यांच्याकडे आपला राजीनामा सुपूर्द केला. त्यानंतर ग्रेटर मँचेस्टरचे माजी महापौर अँडी बर्नहॅम यांनी किंग यांची भेट घेतली आणि औपचारिकपणे पंतप्रधानपदाची जबाबदारी स्वीकारली. ५६ वर्षीय बर्नहॅम अशा वेळी सत्तेत आले आहेत, जेव्हा ब्रिटन अनेक आव्हानांशी झुंजत आहे. यामध्ये मंद आर्थिक वाढ, खराब कामगिरी करणा-या सार्वजनिक सेवा आणि मूलभूत सुविधांच्या समस्या प्रमुख आहेत. सरकारचा कार्यभार सांभाळण्यासोबतच त्यांना आपल्या नवीन मंत्रिमंडळाचीही स्थापना करायची आहे.
नवीन मंत्रिमंडळ पहिले आव्हान
पंतप्रधान झाल्यावर बर्नहॅमसमोरचे पहिले मोठे आव्हान आपल्या मंत्रिमंडळाची स्थापना करणे हे असेल. विशेषत: अर्थमंर्त्यांच्या नियुक्तीकडे सर्वांचे लक्ष असेल, कारण यापूर्वीही पंतप्रधान आणि अर्थमंत्री यांच्यातील मतभेद अनेक सरकारांसाठी अडचणीचे ठरले आहेत. ऊर्जा सुरक्षा मंत्री एड मिलिबँड यांना यापूर्वी या पदासाठी प्रबळ दावेदार मानले जात होते, पण आता गृहमंत्री शबाना महमूद यांचे नाव सर्वात पुढे सांगितले जात आहे. शबाना पाकिस्तानी वंशाच्या नेत्या आहेत. मात्र, बर्नहॅम यांनी सांगितले आहे की त्यांनी अद्याप आपल्या संघावर अंतिम निर्णय घेतलेला नाही आणि अटकळांवर लक्ष देऊ नये.
