न्यूयॉर्क/मॉस्को : दक्षिण कॅलिफोर्नियातील मोहावे वाळवंटातील एडवर्ड्स एअर फोर्स बेसवर सोमवारी भीषण अपघाताची घटना घडली. उड्डाण घेताच अमेरिकन हवाई दलाचे बी-५२ स्ट्रॅटोफोर्ट्रेस बॉम्बर विमान कोसळले. खाली कोसळताच विमानाला आग लागली. यात विमानातील सर्व आठही कर्मचा-यांचा होरपळून मृत्यू झाला. आठ इंजिन असलेले हे विमान एका नियमित चाचणी मोहिमेवर होते.
उड्डाण घेतल्यानंतर काही वेळातच ते एडवर्ड्स येथील धावपट्टीवर कोसळले, अशी माहिती हवाई दलाचे कर्नल जेम्स हेस यांनी दिली. मृतांमध्ये लष्करी अधिकारी, सरकारी कर्मचारी आणि सरकारी कंत्राटदार यांचा समावेश आहे. हे उड्डाण रडार आधुनिकीकरण कार्यक्रमाला सहाय्य करण्याच्या उद्देशाने करण्यात आले होते, असे हेस यांनी पत्रकारांना सांगितले. अपघाताचे कारण अद्याप समजू शकलेले नाही. याबाबत तपास सुरू आहे, असेही त्यांनी नमूद केले.
प्रशिक्षणार्थी उड्डाणादरम्यान रशियन बॉम्बर विमान कोसळले
प्रशिक्षणार्थी उड्डाणादरम्यान रशियन हवाई दलाचे टीयू-२२ए३ हे स्ट्रॅटेजिक बॉम्बर विमान सायबेरियातील इर्कुत्स्क प्रदेशात कोसळले. सुदैवाने विमानातील चारही वैमानिकांनी वेळेत घेतल्याने ते बचावले असून त्यांना किरकोळ दुखापती झाल्या आहेत. चौघांनाही उपचारासाठी रुग्णालयात नेण्यात आले आहे. कामेन्का गावाजवळ हे विमान कोसळल्याचे इर्कुत्स्कचे गव्हर्नर इगोर कोब्झेव्ह यांनी सांगितले. अपघाताची माहिती मिळताच अग्नीशमन दलाने घटनास्थळी धाव घेत आग विझवण्याचे काम सुरू केले. इंजिन निकामी झाल्याने हा अपघात घडला असावा असा अंदाज कोब्झेव्ह यांनी व्यक्त केला. नाटोमध्ये बॅकफायर नावाने ओळखल्या जाणा-या टीयू-२२ हे सोव्हिएत काळातील सुपरसॉनिक बॉम्बर विमान आहे. रशियाने सीरिया आणि युक्रेनमधील लढायांमध्ये याचा वापर केला आहे.
