मुंबई : प्रतिनिधी
आयपीएलमध्ये काल रात्री झालेल्या लढतीत सनरायझर्स हैदराबादने रॉयल चॅलेंजर्स बंगळुरूवर दणदणीत विजय मिळवला. दरम्यान, या लढतीनंतर बंगळुरूचा अष्टपैलू गोलंदाज कृणाल पांड्या याच्यावर सनरायझर्सची मालकीण काव्या मारन हिने काही गंभीर आरोप केले आहेत. काल झालेल्या लढतीत तुफानी फटकेबाजी करणा-या सनरायझर्सच्या फलंदाजांना रोखण्यासाठी कृणाल पांड्याने गोलंदाजीतील सर्व प्रकारचे हातखंडे आजमावले होते. मात्र फलंदाजांना रोखण्यासाठी वैविध्यपूर्ण शैलीत गोलंदाजी करणा-या कृणाल पांड्याच्या गोलंदाजी शैलीवर काव्या मारन हिने प्रश्नचिन्ह उपस्थित केले असून, तो फेकी गोलंदाजी करत असल्याचा आरोपही तिने केला आहे.
सामन्यादरम्यान, कृणाल पांड्या याने नितीश कुमार रेड्डीविरोधात एक वेगवान चेंडू टाकला. तेव्हा काव्या मारन हिने फेकी गोलंदाजीचा इशारा केला. सोशल मीडियावर व्हायरल होत असलेल्या व्हीडीओमध्ये काव्या मारन ही कृणाल पांड्या फेकी गोलंदाजी करत असल्याचा आरोप करताना दिसत आहे. दरम्यान, आता काव्या मारनच्या आक्षेपानंतर बीसीसीआय कृणाल पांड्यावर काय कारवाई करणार हे पाहणे औत्सुक्याचे ठरणार आहे.
हैदराबादचा आक्रमक फलंदाज हेन्रिक क्लासेन खेळपट्टीवर असताना कृणाल पांड्या याला गोलंदाजीसाठी पाचारण करण्यात आले होते. त्यावेळी क्लासेनने पांड्याला षटकार ठोकला. मात्र या षटकात पांड्याने केवळ आठ धावा दिल्या. त्यानंतर १७ व्या षटकात गोलंदाजीसाठी आल्यावर कृणाल पांड्याने दुस-या चेंडूवर क्लासेनची विकेट काढली. मात्र याच षटकात नितीश कुमार रेड्डीने पांड्याच्या गोलंदाजीवर दोन षटकार ठोकले. त्यानंतर या षटकातील शेवटच्या चेंडूवर काव्या मारन हिने कृणाल पांड्या याच्या गोलंदाजीवर प्रश्नचिन्ह उपस्थित केले.
